سەرۆك بارزانی: پێزانینمان بۆ ڕۆڵی ئەڵمانیا لە پاڵپشتیكردنی پێشمەرگە لە شەڕی داعشدا هەیە

ئاڤا نیوز

 

سەرۆک بارزانی لەگەڵ باڵیۆزی نوێی ئەڵمانیا لە عێراق کۆبووەوە و پێزانینی بۆ ڕۆڵی ئەڵمانیا لە پاڵپشتیكردنی پێشمەرگە لە شەڕی تیرۆریستانی داعشدا دەربڕی.

 

چیرۆکی سەرەکی: ئەمڕۆ چوارشەممە 8-10-2025، لە پیرمام سەرۆك بارزانی پێشوازی لە دانیێل كرێبەر، باڵیۆزی نوێی ئەڵمانیا لە عێراق و شاندێكی یاوەری كرد.

 

ڕاگەیێنراوی فەرمی: بارەگای بارزانی ڕایگەیاند، "لە دیدارەکەدا وێڕای بەخێرهاتن و هیوای سەرکەوتن لە کارەکانیدا، سەرۆک بارزانی پێزانینی بۆ ڕۆڵی ئەڵمانیا لە پاڵپشتیكردنی پێشمەرگە لە شەڕی تیرۆریستانی داعشدا هەبوو، پێشوازیشی لە پتەوتركردنی پەیوەندییەكانی نێوان هەرێمی كوردستان و ئەڵمانیا كرد.

 

لەلایەکی دیکە: پەیوەست بە بابەتی تیرۆر، سەرۆك بارزانی ئاماژەی بەوەدا، ڕاستە تیرۆریستانی داعش لەڕووی سەربازییەوە شكستیان خواردووە، بەڵام هۆكارەكانی پشت سەرهەڵدانی تیرۆر هێشتا هەر ماون، بۆیە مامەڵەكردن لەگەڵ دۆسیەی تیرۆر لە عێراق و سووریا و ناوچەكە پێویستی بە وردبینی زیاتر و هەماهەنگیی نێوان لایەنەكان هەیە.

 

بۆچوونی لایەنی بەرامبەر؛ باڵیۆزی نوێی ئەڵمانیا لە عێراق وێڕای ئاماژەدان بە پەیوەندییە مێژووییەكانی نێوان گەلی كوردستان و گەلی ئەڵمانیا، ئەوەشی دووپات كردەوە كە وڵاتەكەی هاوسۆز و پشتیوانی گەلی كوردستان دەمێنێتەوە. هەروەها خوازیاری ئەوە بوو لە بواری هەماهەنگیی ئەمنی و ئابووری و بابەتی كۆچبەران پەیوەندیی نێوان ئەڵمانیا و هەرێمی كوردستان بەردەوام بێت و بەرەو پێشەوە بچێت.

 

هاوکات، جەختیشی لەوە كردەوە، هەرێمی كوردستان لە ناوچەكەدا فاكتەری ئارامی و سەقامگیرییە و دەبێ پاڵپشتی بكرێت.

 

زانیاریی زیاتر: هەر لە دیدارەکەدا، پڕۆسەی ئاشتی لە توركیا و دواپێشهاتەكانی سووریا و هەڵبژاردنی ئەنجوومەنی نوێنەرانی عێراق تاوتوێ کران.