چیرۆکێکی کاریگەر؛ مردنی کچێک لە سەقز ژیانی دایک و باوکی گۆڕیوە بۆ تراژیدیا

ئاڤا نیوز

خۆشەویستی دایک و باوک بۆ منداڵەکانیان هەستێکی بێ سنوورە، هەستێک کە بە تەواوی تێگەیشتنی ئەستەمە تا خۆت نەبیتە دایک یان باوک. ئەو قوربانی و خۆنەویستییەی ئەوان پێشکەشی دەکەن، گەورەترین دیارییە لە ژیاندا. وتراویشە، ڕەزامەندی دایک و باوک کلیلی ڕەزامەندی خوایە. بەڵام چۆن دەتوانین قەرەبووی ئەو خۆشەویستییە بێ ئەندازەیە بکەینەوە. چیرۆکێکی دڵتەزێن لە سەقز، گەواهی ئەم خۆشەویستییە لە بن نەهاتوو و قوربانییە دڵسۆزانەیە دەدات.

چی ڕوویدا: ڕۆژنامەنووس محەممەد ئیبراهیم نەژاد دەڵێت، پێنج ساڵ لەمەوبەر، لە سەردەمی سەختی کۆرۆنا ڕۆژین، کچێکی زیرەک و بەتوانا لە شاری سەقز، کە خەریکی خوێندنی دیپلۆمی باڵا بوو و ئامادەکاری دەکرد بۆ ئەوەی دکتۆراش بخوێنێت، تووشی کۆڕۆنا بوو و  گیانی لەدەستدا. ئەم مەرگە لەناکاوەی ڕۆژین، دایک و باوکی خستە ناو خەم و پەژارەیەکی قووڵەوە کە تا ئێستاش کاریگەری لەسەر ژیانیان ماوە. بۆ ئەوان، وەک بڵێی ڕۆژین هەر ئێستا کۆچی دوایی کردبێت.

باوکی ڕۆژین، کە پێشتر مامۆستا بوو لە سەقز، بەهۆی لەدەستدانی کچەکەیەوە ژیانی لێ تاڵ بوو. وازی لە وانەوتنەوە هێنا و بۆ ئەوەی لە کچەکەی نزیک بێت، دەستی بە فرۆشتنی گوڵ کرد لەبەردەم  ئەو گۆڕستانەی کە کچەکەی تێدا نێژراوە. هەر کەسێک بۆ سەر گۆڕی ئازیزێک بچێت، گوڵێک لە باوکی ڕۆژین دەکڕێت و بۆ ئازیزەکەی دەبات.

لەلایەکی دیکەوە: خەم و پەژارەی دایکە داماوەکەی ڕۆژین قووڵترە. ئەویش وازی لە ماڵ و حاڵی خۆی هێناوە و لە پاڵ گۆڕی ڕۆژین، لەناو گۆڕستانەکەدا، ژوورێکی بچووکی بە تەنەکە دروست کردووە. شەوان لەوێ دەمێنێتەوە و یەک ساتیش گۆڕی کچەکەی بەجێ ناهێڵێت.

ئەو ژوورەکەی پڕکردووە لە وێنەکانی ڕۆژینی کچی، بەتایبەتی ئەو وێنانەی کە ڕۆژین پێدەکەنێت و هی کاتی منداڵیەتی. هەموو بەیانییەک، ئەم دایکە دڵسۆزە دەچێتە سەر گۆڕی کچەکەی، بە جوانی پاکی دەکاتەوە و دەیجوڵێنێت و گوڵڕێژی دەکات، پاشان بە دڵێکی پڕ لە خەم و پەژارەوە دادەنیشێت و لاوانەوە بۆ ڕۆژین دەکات، هەمان ئەو لاوانەوانەی کە کاتێک ڕۆژین لە ژیاندا بوو و ئاوەدانی ماڵەکەیان بوو، بۆی دەکرد.

"ڕۆژینەکەم نەمردووە، ڕۆژینەکەم نەڕۆیشتووە. ئەو تۆزێک زووتر لە من چووە بۆ قوتابخانە و پۆلێکی تری ژیان."