لە ڕۆژهەڵاتی کوردستان هێرش دەکرێتە سەر کانێکی زێڕ

ئاڤا نیوز

 

ناڕەزایەتیی هاووڵاتییانی شاری بانە لە ڕۆژهەڵاتی کوردستان دژی چالاکیی کۆمپانیاکانی دەرهێنانی زێڕ لە کانەکانی ئەو ناوچانە، توندوتیژیی لێکەوتەوە و خەڵکی تووڕە هەڵیانکوتایە سەر کەرەستە و ئۆتۆمبێلەکانی یەکێک لەو کۆمپانیایانە و ئاگریان تێبەردا.

 

هۆکارە زانراوەکان؛ خەڵکی ناڕازیی بانە لە کارکردن لەو کانە زێڕانە نیگەرانن و دەڵێن، داهاتی ئەم کانە زێڕانە "تەنها دەچێتە گیرفانی چەند کەسێکی دیاریکراوەوە، لە کاتێکدا خەڵکی ناوچەکە بێبەشن و تەنها زیانەکانیان بۆ ماوەتەوە."

دانیشتووانی ناوچەکە توڕەن لە زیانە ژینگەیی و سروشتییەکانی ئەو کانە زێڕانە، کە بووەتە هۆی تێکدانی سیمای جوگرافی و ژینگەی ناوچەکە. هاووڵاتییان پێیان وایە کە چالاکیی ئەم کۆمپانیایانە جگە لە وێرانکردنی سروشتی کوردستان، هیچ سوودێکی بۆ خەڵکی ناوچەکە نەبووە.

زانیاریی زیاتر؛ ئەم کاردانەوەیەی هاووڵاتییان دوای ئەوە دێت کە چەندین جار داوایان لە بەرپرسان کردووە کە کارکردن لەو کانانەدا ڕابگیرێت، بەڵام وەک خۆیان دەڵێن، داواکارییەکانیان بەردەوام پشتگوێ خراوە.

 

پەیامی خۆپیشاندەران بۆ کۆمپانیاکە ڕوون بوو: "ئێوە ناوچەکەتان وێران کردووە، دەبێت لێرە بڕۆن و نەمێنن."