داواکارییەکی بەپەلە لە سەرۆکایەتیی ڕۆحی درووزەکانەوە بۆ نەتەوەیەکگرتووەکان و کۆمەڵگەی نێودەوڵەتی

ئاڤا نیوز

سەرۆکایەتیی ڕۆحی درووزەکان داوایەکی بەپەلە ئاڕاستەی نەتەوەیەکگرتووەکان و کۆمەڵگەی نێودەوڵەتی دەکات بۆ ئەوەی دەستوەردانی خێرا بکەن و گەمارۆی سەر سوەیدا و دەوروبەری هەڵبگرن. هاوکات داوای دابینکردنی ڕێڕەوی مرۆیی و لێپرسینەوە لە بەرپرسانی پێشێلکارییەکان دژی هاووڵاتیانی مەدەنی کردووە.

 

وێنە گەورەکە: ناوەڕاستی مانگی تەمموزی ئەمساڵ ڕووبەڕووبوونەوەیەکی خوێناوی لەنێوان پێکهاتەی درووزەکان لە پارێزگای سوەیدا و هێزەکانی سەر بە حکومەتی سووریا ڕوویدا، لە ئەنجامیشدا زیاتر لە هەزار و 600 کەس کوژران و دەیان هەزار کەسیش ئاوارەبوون. تاوەکو ئێستا دۆخی شارەکە ئاسایی نەبووەتەوە، ناوە ناوە هێرشیان دەکرێتە سەر.

 

پەیامی فەرمی: سەرۆکایەتیی ڕۆحی درووز لە پەیامێکدا کە ئاڕاستەی نەتەوەیەکگرتووەکان و کۆمەڵگەی نێودەوڵەتی و زۆرێک لە لایەنە نێودەوڵەتی و ناوچەییەکانی بواری مافی مرۆڤ کراوە، تیایدا باس لە دۆخی سوەیدا کراوە و داواکارییەکی بەپەلە خراوەتەڕوو بۆ هەوڵە ناوچەیی و نێودەوڵەتییەکان.

 

لە پەیامەکەدا هاتووە: "بە ناوی سەرۆکایەتی ڕۆحییەوە، ئەم داواکارییە مرۆییە بەپەلەیە ئاڕاستە دەکەین، کە هەڵگری دەنگ و ئازارەکانی خەڵکەکەمانە لە جەبەلی پاشان. ئەم خەڵکە ماوەی چەند مانگێکە تووشی گەمارۆیەکی گشتگیر و سەخت بووە کە ژیانی هاووڵاتیانی مەدەنی دەخاتە مەترسییەوە و هەموو نیشانەکانی ژیانێکی شکۆمەندانە خنکاندووە. گەمارۆکە هەموو شتێکی گرتووەتەوە، وەک خۆراک، دەرمان، ئاو، سووتەمەنی و ئازادی هاتووچۆ.

 

درێژەی پەیامەکە:

- یارمەتییە نێودەوڵەتییە سنووردارەکان بەشمان ناکەن و بۆ شاردنەوەی ڕاستییەکان بەکاردەهێنرێن. مووچە و خانەنشینی فەرمانبەران بڕدراون، دامودەزگا گشتییەکان ئیفلیج بوون، خوێندکارانی زانکۆ و قوتابخانەکان لە خوێندن بێبەش کراون. گوندەکانمان داگیرکراون و دامەزراوە گرنگەکان وێران بوونە، بە ئەنقەست ڕێگری لە گەیشتنی سووتەمەنی دەکرێت، ئەمەش بووەتە هۆی داڕمانی کەرتی تەندروستی و مردنی چەندین نەخۆش.

- ئێمە لە زیندانێکی گەورەدا گەمارۆ دراوین، ژیانی خەڵکەکەمان سنووردار و چاودێریکراو و هەڕەشەی لەسەرە. ئەمە هەوڵێکە بۆ لەناوبردن یان ملکەچپێکردن.

- هەرچەندە خەڵکەکەمان پابەند بوون بە بڕیارەکانی ئاگربەست، کاتی ئەوە هاتووە کە گەمارۆکە هەڵبگیرێت و یاسای نێودەوڵەتی جێبەجێ بکرێت بۆ لێپرسینەوە لە حکومەتی کاتی و میلیشیاکانی کە تاوانیان دژی خەڵکەکەمان ئەنجام داوە."

 

داواکاری فەرمی: سەرۆکایەتیی ڕۆحی درووزەکان داوا لە نەتەوەیەکگرتووەکان و ئەنجوومەنی ئاسایش و کۆمەڵگەی نێودەوڵەتی دەکەن کە بەپەلە کار بکەن و ئەم هەنگاوانە بنێن:

1. دەستبەجێ هەڵگرتنی گەمارۆ و دابینکردنی ڕێڕەوی مرۆیی پارێزراو.
2. لێپرسینەوە لە بەرپرسان و ئەنجامدەرانی تاوانەکان لەبەردەم دادگای نێودەوڵەتی.
3. ناچارکردنی لایەنە چەکدارە داگیرکەرەکان بە کشانەوەی تەواو و گەڕاندنەوەی هەموو ئەو زەوییانەی داگیرکراون.
4. کردنەوەی دەروازەی مرۆیی نێودەوڵەتی بۆ ئاسانکاری گەیشتنی یارمەتییەکان.
5. خێراکردن لە ڕێگەدان بە خەڵکی چیاکە بۆ جێبەجێکردنی مافی چارەی خۆنووسین لەژێر سەرپەرشتی نەتەوەیەکگرتووەکان و پاراستنی نێودەوڵەتی.

 

لە کۆتاییدا، سەرۆکایەتیی ڕۆحی درووزەکان سوپاسی هەموو ئەوانە دەکات کە پشتیوانییان کردوون و گلەیی و پەژارەی خۆیان دەردەبڕن بەرامبەر بەوانەی بێدەنگ بوون لە ئاست ئەو تاوانانە.