مالیکی: هیچ کەسێک مافی ئەوەی نییە تواناکانی دەوڵەت لە هەڵبژاردندا بەکاربهێنێت

ئاڤا نیوز

سەرۆکی هاوپەیمانی دەوڵەتی یاسا دەڵێت، داوا دەکات هەمووان دژی بەکارهێنانی ماڵی سیاسی و  تواناکانی دەوڵەت لە بانگەشەی هەڵبژاردن بوەستنەوە،  هاوکات ڕەتیشیدەکاتەوە توانای دەوڵەت لە کاری سەرکەشی و دەستوەردان لە کاروباری ئەوانی دیکەدا بەکاربهێنرێت.

وێنە گەورەکە: بۆ هەڵبژاردنی پەرلەمانی عێراق لەناو ماڵی شیعەدا هەشت لیستی سەرەکی کێبڕکێی یەکتر دەکەن، لەناو ئەو لیستانەشدا هاوپەیمانی ئاوەدانکردنەوە و گەشەپێدانی محەممەد شیاع سوودانی، سەرۆکوەزیران و هاوپەیمانی دەوڵەتی یاسای نووری مالیکی، سەرۆکوەزیرانی پێشووتری عێراق، کێبڕکێی تووندی یەکتر دەکەن بۆ بەدەستهێنانی زۆرترین کورسی لەسەر ئاستی عێراق.

لێدوانی فەرمی: نووری مالیکی، سەرۆکی هاوپەیمانی دەوڵەتی یاسا ئەمڕۆ شەممە لە وتارێکدا لە بەغدا ئاماژەی بەوەشکرد، لەڕێگەی هەڵبژاردنەوە چاککردن و پاراستنی ئاڕاستەی سیاسی وڵات بەدیدەهێنن، بۆیەش کەس مافی ئەوەی نییە تواناکانی دەوڵەت بۆ بانگەشەی هەڵبژاردن بەکاربهێنێت.

وتیشی، دەیانەوێت هیچ دەروازەیەک نەبێت تا لەڕێگەیەوە دیکتاتۆریەت و پەراوێزخستنی پێکهاتەکان بۆ عێراق بگەڕێتەوە، دەشیانەوێت سامانی وڵات لە خزمەتی خەڵکدا خەرج بکرێتەوە نەک لە سەرکەشی و دەستوەردان لە کاروباری ئەوانی دیکەدا.