زاخۆ بە پاکترین شاری کوردستان و عێراق دەستنیشان کرا

ئاڤا نیوز

 

بەپێی ڕاپرسییەک، ناوچە گەشتیارییەکانی ئیدارەی سەربەخۆی زاخۆ و سەنتەری شارەکە بە پاکترین ناوچەی گەشتیاریی بۆ هاوینی ئەمساڵ دەستنیشانکران.

چیرۆکی سەرەکی: ئاژانسی "ڕاما ئێجێنسی" لە ڕێککەوتی 17-9-2025 تاوەکو 19-9-2025، هەزار و 200 فۆرمی بۆ دەستنیشانکردنی پاکوخاوێنترین ناوچەی گەشتیاریی هەرێمی کوردستان، لە 12 ناوچەی گەشتیاری لە سەرانسەری هەرێمی کوردستان بەسەر گەشتیارانی ناوخۆ و دەرەوە دابەش کرد، بەپێی ئەم ڕاپرسییە، زاخۆ پلەی یەکەمی بەدەستهێناوە.

لێدوانی فەرمی: ڕێبوار عوسمان، بەڕێوەبەری ڕاما ئەجێنسی بە ئاڤا میدیای ڕاگەیاند، پێشکەوتنی زاخۆ لە بواری گەشتیاریدا تەنها لە دروستکردنی شوێنی گەشتیاری و خزمەتگوزاریدا قەتیس نەماوە، بەڵکو لە ڕووی پاکوخاوێنییەوە بووەتە جێگەی سەرنجی گەشتیاران و لە نوێترین ڕاپرسییشدا، پلەی یەکەمی بەدەستهێناوە.

باس لەوەش دەکات، زاخۆ توانیویەتی ڕێژەی 93.9%ی ڕەزامەندیی گەشتیاران سەبارەت بە پاکوخاوێنی بەدەستبهێنێت و پلەی یەکەمی گرتووە، هەروەها بەرزترین ئاستی لە ڕاکێشانی ئەو گەشتیارانەدا تۆمار کردووە کە بۆ یەکەمجار سەردانی ناوچەکەیان کردووە.

زانیاریی زیاتر: دوای زاخۆ، دهۆک و ئامێدی پلەکانی دووەم و سێیەمیان بە دەستهێناوە.

ئەوەی پێویستە بیزانیت: بەپێی ڕاپرسییەکە، فۆرم لە "هەولێر، سلێمانی، دهۆک، سۆران، زاخۆ، ئاکرێ، ئامێدی، شەقڵاوە، ڕاپەرین، دووکان، ئەحمەد ئاوا و هەورامان" دابەشکراوە، شوێنەکان لەڕووی پاکوخاوێنییەوە بەم شێوەیە ڕیزبەند کراون:

زاخۆ: بەڕێژەی 93.9%

دهۆک: بە ڕێژی 91.8%

ئامێدی: بەڕێژەی 90%

سلێمانی: بە ڕێژەی 85.9%

هەولێر: بەڕێژەی 70.8%

دووکان: بەڕێژەی 66%

ئاکرێ: بەڕێژەی 65%

شەقڵاوە: بە ڕێژەی 63.2%

سۆران: بە ڕێژەی 53.3%

هەورامان: بە ڕێژەی 50.5%

ئەحمەد ئاوا: بە ڕێژەی 38.1%

ئیدارەی ڕاپەڕین: بە ڕێژەی 38%

هۆکارە زانراوەکان: بەپێی ڕاپرسییەکە، هۆکاری هاتنی گەشتیاران بۆ زاخۆ بۆ سێ پێوەر دەگەڕێتەوە کە ئەمانەن: "پاکوخاوێنە، سرووشتێکی جوانی هەیە، شوێنێکی مێژوویی و کولتووری هەیە."