سوودانی: بەهیواین سێ ساڵی دیکە پێویستمان بە ئێران نەمێنێت

ئاڤا نیوز

سەرۆکوەزیرانی عێراق ڕایدەگەیێنێت، وڵاتەکەی هیواخوازە تا ساڵی 2028 کۆتایی بە پشتبەستنی بە گازی ئێران بهێنێت، کە بە بەهای 4 ملیار دۆلار لە ساڵێکدا هاوردە دەکرێت. 

 

وێنە گەورەکە: عێراق چەندین ساڵه پشت به هاوردەکردنی کارەبا و گازی ئێران دەبەستێت، بە تایبەتیش لە وەرزی هاوین، ئەمەش دوای ئەو لێخۆشبوونەی لەلایەن ئەمریکاوە بە عێراق درابوو بۆ هاوردەکردنی کارەبا و گازی ئێران.

 

لێدوانی فەرمی؛ محەممەد شیاع سوودانی، سەرۆکوەزیرانی عێراق بە کەناڵی CNBCـی ئەمریکی ڕاگەیاند،"هیوادارین تا ساڵی 2028 کۆتایی بە پشتبەستنی وڵاتەکەمان بە گازی ئێران بهێنین، کە بڕەکەی دەگاتە 4 ملیار دۆلار، ئەمەش لە هەوڵێکدا بۆ هەمەجۆرکردنی ئابووری."

 

زانیاریی زیاتر: بەگوتەی سوودانی، بەغدا چەندین ڕێککەوتنی لەگەڵ کۆمپانیای تۆتاڵ ئینێرجی فەرەنسی و هەروەها کۆمپانیاکانی چین و ئیمارات واژۆ کردووە. ئەم ڕێککەوتنانە بە بەهای 4 بۆ 5 ملیار دۆلار لە ساڵێکدا، بە ئامانجی وەبەرهێنانە لە کۆکردنەوەی ئەو گازەی کە لە ئێستادا دەسوتێنرێت.

 

لەهەمان کاتدا: سوودانی ڕایگەیاند، بەرهەمهێنانی نەوت بڕێکی زۆر گاز دەردەدات کە بەزۆری دەسوتێنرێت، ئەم پڕۆسەیە بە "فلێرینگ" ناسراوە، بە وەرگرتنەوە و پرۆسێسکردنی ئەو گازە، لەجیاتی بەفیڕۆدانی، دەتوانرێت کێشەی کەمی کارەبای عێراق چارەسەر بکرێت.