سەرۆکوەزیران مەسرور بارزانی: وەبەرهێنان لە هزر و بیری گەنجان دەکەین

ئاڤا نیوز

 

سەرۆکوەزیران مەسرور بارزانی ڕایگەیاند، لە هەرێمی کوردستان لە زۆر بوار و سێکتەری جیاواز وەبەرهێنانی زۆرمان کردووە، ئەمجارە وەبەرهێنان لە هزر و بیری گەنجەکان دەکەین.

 

وێنە گەورەکە: ئەمڕۆ چوارشەممە بە ئامانجی کۆکردنەوەی داهێنەران و بەهرەمەندان و پسپۆڕان و کارئاسانی و ڕەخساندنی دەرفەرت بۆ پەرەپێدانی بیرۆکەکانیان، بەردی بناغەی پارکی زانست لە شاری هەولێر دانرا، کە بۆ یەکەمجارە لە عێراق پرۆژەیەکی لەمجۆرە دروست دەکرێت.

 

لێدوانی فەرمی: سەرۆکوەزیران مەسرور بارزانی لە وتارێکدا لەکاتی دانانی بەردی بناغەی پارکی زانست لە هەولێر دیدگای حکومەتی هەرێمی کوردستانی بۆ پشتیوانیکردنی داهێنان و نوێگەری خستەڕوو و ڕایگەیاند: "لە هەرێمی کوردستان لە زۆر بوار و سێکتەری جیاواز وەبەرهێنانی زۆرمان کردووە، ئەمجارە وەبەرهێنان لە هزر و بیری گەنجەکان دەکەین، کە گەورەترین سەرمایەی وڵاتەکەمانن. ئومێدێکی یەکجار زۆرم هەیە ئەم پرۆژەیە دەبێتە پرۆژەیەکی زۆر گەورە، بۆ خزمەت کردن و پێشخستنی کوردستان."

 

خاڵە ئەرێنییەکان؛ ئامانجی سەرەکی لە دامەزراندنی ئەم پارکە زانستییە، دابینکردنی ژینگەیەکی لەبارە بۆ داهێنەران و بەهرەمەندان. سەرۆکوەزیران لەمبارەیەوە گوتی: "دامەزراندنی ئەم پارکە بۆ ئەوەیە ئاسانکاری بۆ داهێنەران بکەین و تاقیگە و کارگەی جۆراوجۆریان بخەینە بەر دەست تا بتوانن بیرۆکە و توێژینەوەکانیان بە شێوەیەکی کرداری لە بوارە جیاوازەکان تاقیبکەنەوە و بە ئەنجامیان بگەیەنن."

 

- مەسرور بارزانی ئاماژەی بەوەشکرد کە گەنجی بەهرەمەندی زۆر لە کوردستاندا هەن، بەڵام نەبوونی دەرفەت و شوێنی گونجاو ڕێگر بووە لەوەی وەک پێویست سوود لە تواناکانیان وەربگیرێت. لەم چوارچێوەیەدا، بانگهێشتی سەرجەم بەهرەمەند و داهێنەرانی لە ناوخۆ و دەرەوەی هەرێمی کوردستان کرد کە لە ڕێگەی ئەم پارکەوە پەرە بە بیرۆکەکانیان بدەن و بیکەنە ناوەندێکی گرنگی داهێنان لە ناوچەکەدا.

 

- لە بەشێکی تری قسەکانیدا سەرۆکوەزیران وتی: "تا مرۆڤایەتی هەبێت، داهێنان بەردەوام دەبێت، بە تایبەت ئێمە لە سەردەمی شۆڕشی تەکنەلۆژیا و ژیریی دەستکرد دەژین... بۆیە هەموو بیرۆکەیەکی دا‌هێنان پێویستی بە ژینگەیەکی لەبار و پشتیوانی هەیە، بۆ ئەوەی بە ئەنجام بگات."

 

ئەوەی پێویستە بیزانیت: لە کۆتاییدا، سەرۆکوەزیرانی کوردستان پشتیوانیی تەواوی حکومەتی بۆ داهێنان، نوێگەری و کاروباری زانستی دووپاتکردەوە و وتی: "دەمانەوێت کوردستان ببێتە ئەو شوێنەی گەنجەکانمان لێرە بتوانن بیرۆکەکانی خۆیان بکەن بە پرۆژە."