لە هەولێر زەوی بەسەر فەرمانبەرانی ناحیەی ڕزگاری دابەش دەکرێت

ئاڤا نیوز

لە چوارچێوەی پرۆسەی دابەشكردنی زەوی بەسەر فەرمانبەراندا، سبەی پێنجشەممە نزیكەی دوو هەزار پارچە زەوی لە سنووری سەرۆكایەتیی شارەوانیی ڕزگاریی سەر بە بەڕێوەبەرایەتیی گشتیی شارەوانییەكانی هەولێر دابەش دەكرێت.

وێنە گەورەکە: بەپێی بڕیاری ئەنجوومەنی وەزیران هەموو ئەو فەرمانبەر، خانەنشین و پێشمەرگانەی مەرج و ڕێنمایی پێدانی زەوی دەیانگرێتەوە پارچەیەک زەوییان پێدەدرێت، هەموو شارەوانییەکان ئامادەکاری بۆ جێبەجێکردنی ئەو بڕیارە دەکەن، لە ژمارەیەک لە شارەوانییەکانیش زەوی بەسەر فەرمانبەران دابەش کراوە.

لێدوانی فەرمی: ڕێباز قاسم عەزیز، بەڕێوەبەری شارەوانیی ڕزگاری بە ئاڤای ڕاگەیاند، نزیکەی هەزار و 800 پارچە زەوی ئامادە کراوە و بڕیارە سبەی بەسەر فەرمانبەرانی مەدەنی و سەربازی دابەش بکرێن.

بەگوتەی ڕێباز، ئەوەی سبەی وەجبەی یەکەمە لە سنوورەکە، لەوانەیە هەموو فەرمانبەران لێی سوودمەند بن، ئەوانەی دەمێننەوە لە ماوەیەکی زۆر کەمدا لە وەجبەی دووەم لێی سوودمەند دەبن، زەوی بۆ ئەوانیش ئامادەکراوە.

زانیاریی زیاتر: زیاتر لە دوو هەزار و 700 پارچە زەوی ئامادەکراوە بۆ قەرەبووکردنەوەی ئەو جووتیارانەی کە خاوەندارێتی زەوییە کشتووکاڵییەکان دەکەن و دەدرێت بە فەرمانبەرانی ئەو سنوورە.

ئەمەش بزانە: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، تاوەکو ئێستا سەرووی 10 هەزار کەس تیروپشکی وەرگرتنی زەوییان بۆ کراوە.