پارێزگاری بەسرە: پڕۆژەکانی دابینکردنی ئاوی خواردنەوە دەستپێدەکات

ئاڤا نیوز

ڕۆژی هەینی، ئەسعەد عیدانی پارێزگاری بەسرە وادەی دەستپێکردنی پڕۆژەکانی ئاوی خواردنەوەی لە پارێزگاکەی ڕاگەیاند.

وێنە گەورەکە: نەبوونی ئاوی خواردنەوە کێشەیەکی کۆن و قووڵە لە بەسرە، لەوەتەی ئەم پارێزگایە هەیە، خەڵکەکەی خەون بە چۆڕێک ئاوی شیاوی خواردنەوە دەبینن. هەرچەندە هەموو حکومەتە یەک لە دوای یەکەکانی عێراق بەڵێنی چارەسەرکردنی ئەم کێشەیەیان داوە، بەڵام تا ئێستا نەک هەر ئاوی شیرین دابین نەکراوە، بەڵکو کێشەی ئاوی سوێریش وەک خۆی ماوەتەوە.

ڕاگەیێنراوی فەرمی: عیدانی لە ڕاگەیێنراوێکی کورتدا بەڵێنی چارەسەرکردنی قەیرانی ئاوی بەسرەی دا. دەشڵێت "هەروەک چۆن قەیرانی کارەبا لە ساڵی 2018 چارەسەر کرا."

ئەوەی پێویستە بیزانیت: لە مانگی تەمموزی ئەمساڵ، محەممەد شیاع سوودانی، سەرۆکوەزیرانی عێراق لە میانی سەردانەکەیدا بۆ پارێزگای بەسرە، کارەکانی جێبەجێکردنی پڕۆژەی ستراتیژیی شیرینکردنی ئاوی دەریایی لە نزیک بەندەری گەورەی فاو ڕاگەیاند کە توانای دابینکردنی یەک ملیۆن مەتر سێجا ئاوی لە ڕۆژێکدا هەیە.