جەواد زەریف: ڕووسیا نایەوێت پەیوەندیمان لەگەڵ وڵاتان باش بێت

ئاڤا نیوز

وەزیری پێشووی دەرەوەی ئێران، هاوتا ڕووسییەکەی، بە تێکدانی ڕێککەوتنی ئەتۆمی ساڵی 2015ـی وڵاتەکەی تۆمەتبار کرد و ڕایگەیاند، سێرگی لاڤرۆڤ سیاسەتێک پەیڕەو دەکات کە ئامانجیەتی ڕێگری لە پەیوەندی ئاشتیانەی تاران لەگەڵ جیهاندا بکات.

چیرۆکی سەرەکی: ئێران، ڕووسیا بەوە تۆمەتباردەکات میکانیزمی گەڕانەوەی سزاکانی سەر ئێران پێشنیازی ئەوان بووە و ئەو وڵاتە نایەوێت ئێران بە ئاشتیانە لەگەڵ وڵاتاندا بژی.

لێدوانی فەرمی: محەممەد جەواد زەریف، وەزیری پێشووی دەرەوەی ئێران ڕایگەیاند، مۆسکۆ دوو هێڵی سووری هەیە: یەکەم، ئێران هەرگیز نابێت پەیوەندیی ئاشتیانەی لەگەڵ جیهاندا هەبێت، و دووەمیش، نابێت بێتە ناو ململانێ لەگەڵ جیهاندا. وتیشی، بڕگەی گەڕانەوەی سزاکان پێشنیازی ڕووسیا و فەڕەنسا بووە.

ئەوەی پێویستە بیزانیت: بەپێی بڕگەی گەڕانەوەی سزاکان، ئەگەر ئێران پابەندییەکانی بەپێی ڕێککەوتننامەی قەدەغەکردنی بڵاوکردنەوەی چەکی ئەتۆمی پێشێل بکات، سزا نێودەوڵەتییەکان بەسەر ئەو وڵاتەدا دەسەپێندرێت. بەمەش لە مانگی نۆدا، نەتەوەیەکگرتووەکان بە فەرمی گەمارۆی گشتیی چەک و سزاکانی بەسەر ئێراندا سەپاندەوە.

باکگراوند: پێشتر، سێرگی لاڤرۆڤ، وەزیری دەرەوەی ڕووسیا ڕایگەیاند، بڕگەی گەڕانەوەی سزاکان لە ڕێککەوتنی ساڵی 2015 تەڵەیەکی یاسایی بووە و سەری سوڕماوە کە لە کاتی دانوستانەکاندا ئێران قبووڵی کردووە و ئەم بڕگەیە ڕاستەوخۆ لە نێوان محەممەد جەواد زەریف و جۆن کێری لە قۆناغی کۆتایی دانوستانەکاندا ڕێککەوتنی لەسەر کراوە.