کۆمەڵێک گەنج بە خشتی قوڕ هاوشێوەی کۆن خانووەکانیان دروست دەکەن

ئاڤا نیوز

 

بۆ پاراستنی میراتی کولتووری و ژینگەیی، کۆمەڵێک گەنجی کورد کارگەیەکی بچووکیان دامەزراندووە بۆ دروستکردنی خشتی قوڕ و دواتر خانووی قوڕ بە هەمان شێوازی کۆنی کوردەواری.

ئەوەی پێویستە بیزانیت؛ شێوازی دروستکردنی قوڕەکە و دروستکردنی خشتی قوڕەکە، پڕۆسەیەکی ورد و نەریتییە و هەمان ئەو شێوازە کۆنانە دەگرێتەوە کە باپیرانمان بەکاریان هێناوە:

 

-کۆکردنەوەی قوڕ: سەرەتا جۆرێکی تایبەتی قوڕی سوور لە شاخەکانی دەوروبەر دەهێنرێت. ئەم قوڕە بە تایبەتی هەڵدەبژێردرێت بەهۆی تایبەتمەندییە سروشتییەکانییەوە کە گونجاوە بۆ دروستکردنی خشتی بەهێز.

- تێکەڵکردن: دواتر قوڕەکە لەگەڵ ئاو و کا (پووش و قوپانی گەنم یان جۆ) تێکەڵ دەکرێت. کا ڕۆڵێکی گرنگ دەبینێت لە بەهێزکردنی خشتەکە و ڕێگریکردن لە قڵیشان.

- شێلان: بۆ ماوەی چەند کاتژمێرێک گەنجەکان بە قاچەکانیان قوڕەکە دەشێلن. ئەم هەنگاوە گرنگە بۆ تێکەڵکردنی باشی پێکهاتەکان کە دەبێتە هۆی خشتێکی یەکگرتوو و پتەو.

وشککردنەوە: دوای ئەوە، خشتەکان بە شێوەیەکی سروشتی بۆ ماوەی سێ ڕۆژ لەبەردەم تیشکی خۆر دادەنرێن تا بە تەواوی وشک دەبنەوە و قایم دەبن.

بۆچی گرنگە؛ دروستکردنی خانوو بە خشتی قوڕ چەندین سوودی گرنگی هەیە لەوانە: 

- پاراستنی کولتوور: ژیانەوەی شێوازی دروستکردنی خانووی قوڕ یارمەتیدەرە لە پاراستنی بەشێکی گرنگی کولتوور و تەلارسازیی نەریتی کورد.

ژینگەدۆستی: خانووی قوڕ بە ژینگەدۆست دادەنرێت، چونکە کەمترین کاریگەریی خراپی لەسەر ژینگە هەیە و کەمترین وزە بۆ دروستکردنی بەکار دەهێنرێت بە بەراورد بە ماددە نوێیەکانی بیناسازی. ئەمە سەڕەڕای ئەوەی دەتوانێت بە ئاسانی لەگەڵ سەرمای زستان و گەرمای هاوین خۆی بگونجێنێت.