لە شەش ساڵدا سێ هەزار و 300 پرۆژەی ڕێگاوبان و شەقامەکان جێبەجێ کراون

ئاڤا نیوز

 

لە ماوەی کابینەی نۆیەمی حکومەتی هەرێمی کوردستان نزیکەی سێ هەزار و 300 پرۆژە لە بواری ژێرخانی ڕیگاوبانەکانی دەرەوەی شارەکان و شەقام و پردی ناوشارەکان جێبەجێ کراون.

 

وێنە گەورەکە؛ یەکێک لەو سێکتەرانەی لە کابینەی نۆیەمی حکومەتی هەرێمی کوردستان گرنگی و بایەخی زۆری پێدراوە بەهێزکردنی ژێرخانی ڕێگاوبانەکان و دروست کردنی شەقام و پردی ناوشارەکان و ڕێکخستنی شەقام و ڕێگاوبانەکان بووە، ئەمەش کاریگەری گەورە و ڕاستەوخۆی لەسەر هاتووچۆی هاونیشتمانیان دروست کردووە و ئاسانکارییەکی زۆری لەو ڕوەوە کردووە.

 

ژمارەکان وادەڵێن؛ لە بواری ڕێگاوبانەکانی دەرەوەی شارەکان ژمارەیەک پرۆژەی ستراتیژی  و ڕێگاوبانی بەستنەوەی شار و شارۆچکە و گوندەکان بەیەکتر جێبەجێ کراون، بەمجۆرە: 

 

کۆی گشتیی ڕێگا و پردی دەرەوەی شارەکان کە کەوتوونەتە باری جێبەجێکردن: 

-کۆی گشتیی پرۆژەکان: هەزار و 119 پرۆژە.
-کۆی گشتیی بودجەی تەرخانکراو : چوار تریلیۆن و 30 ملیار دینار.
-کۆی گشتیی ڕێگا: پێنج هەزار و 126 کیلۆمەتر.

-لەو ژمارەیە 718 پرۆژە بە گوژمەی نزیکەی یەک تریلیۆن و سێ ملیار دینار تەواو کراون، کە دوو هەزار و 681 کیلۆمەتر ڕێگا دروست کراوە و کەوتووەتە خزمەت هاونیشتمانیان.

-401 پرۆژە بە گوژمەی نزیکەی سێ تریلیۆن و 28 ملیار دینار لە قۆناغی جێبەجێ کردنن کە دوو هەزار و 445 کیلۆمەتر ڕێگایان لە خۆگرتووە.

 

لەلایەکی دیکە؛ لە ناو سەنتەری شارەکان بە گوژمەی دوو تریلیۆن دینار دوو هەزار و 168 پرۆژە لە شەقام و پردی ناو سەنتەری شارەکان جێبەجێ کراون.

 

گۆشەیەکی دیکەی دیمەنەکە؛ سەدان پرۆژە لە بواری هێڵکاری و ڕێکخستنی شەقام و ڕێگاوبانەکان و پردی پەڕینەوە جێبەجێ کراون:
-59 پرد و پردی پەڕینەوە.
-45 کیلۆمەتر پەرژینی ئاسنین بۆ ڕێگا و شەقامەکان.
-883 کیلۆمەتر هێڵکاری ڕێگا و شەقامەکان.
-296 هێڵکاری پەڕینەوەی پیادە.
-هەزار و 500 بەربەستی کەم کردنەوەی خێرایی.
-16 هەزار هێمای هاتووچۆ.