ڕاوێژکاری ئاسایشی نیشتمانیی عێراق دەچێتە ئێران

ئاڤا نیوز

ئەمڕۆ دووشەممە، قاسم ئەعرەجی، ڕاوێژکاری نیشتمانیی عێراق بە سەردانێکی فەرمیی دەچێتە ئێران و لەگەڵ بەرپرسانی باڵای ئەو وڵاتە تاوتوێی چوار پرسی هاوبەش دەکەن.

وێنە گەورەکە: عێراق و ئێران لەسەر چەندین ئاست ڕێککەوتنی ئەمنییان هەیە و لەماوەی ڕابردوو چەندین جار ئەعرەجی سەردانی تارانی کردووە.

زانیاریی بەدەستهاتوو: بەگوێرەی میدیاکانی ئێران، "سەردانەکەی ئەعرەجی لەسەر داوای فەرمیی عەلی لاریجانی، ئەمینداری ئەنجوومەنی ئاسایشی نەتەوەیی ئێرانە. ئەعرەجی لەگەڵ بەرپرسانی ئێران تاوتوێی ڕێگاکانی بەرزکردنەوەی هاوکارییە ئەمنی و هەواڵگرییەکان، بەرەنگاربوونەوەی تیرۆر و پەرەپێدانی هاوکارییە ئابوورییەکانی نێوان هەردوو وڵات دەکات، هاوکات، هەردوولا پەرەسەندنەکانی ناوچەکە و پرسی سنوورەکان تاوتوێ دەکەن.

زانیاریی زیاتر: ئەم سەردانەی ئەعرەجی هاوکاتە لەگەڵ نزیکبوونەوەی هەڵبژاردنی پەرلەمانی عێراق و ئاگربەست لە غەززە و پێشهاتە سیاسییەکانی سووریا و ناوچەکە.