ئاڤای خەڵک؛ دانیشتووانی گەڕەکی جیهان لە سلێمانی داوای خزمەتگوزاری دەکەن

ئاڤا نیوز

دانیشتووانی گەڕەکی جیهان لە شاری سلێمانی، ماوەی هەشت ساڵە لە کێشەیەکی خزمەتگوزاری سەرەتاییدا دەژین و داواکارییان بۆ قیرتاوکردنی کۆڵانەکان و ڕاکێشانی تۆڕی ئاو بێ وەڵام ماوەتەوە.

زانیاریی بەدەستهاتوو: یەکێک لە دانیشتووانی گەڕەکەکە بە ئاڤای ڕاگەیاند، "هەموومان خەڵکی کەمدەرامەتین، کڕینی ئاو ژیانمانی قورستر کردووە، ئەمە جگە لە خۆڵ و قوڕ و لیتەی گەڕەکەکە کە بەتەواوی بێزاری کردووین." ئەو هاوڵاتییە ئاماژەی بەوەشدا کە "ماوەی هەشت ساڵە داواکاری پێشکەش دەکەین و هیچ وەڵامێک وەرناگرینەوە."

لێدوانی فەرمی: بەختیار تاهیر، بەڕێوەبەری ئاوی سلێمانی، سەبارەت بە کێشەی تۆڕی ئاوی گەڕەکی جیهان بە ئاڤای ڕایگەیاند: "دیزاین و دەرخستەی پڕۆژەکە تەواو بووە، هەموو کارە ئیدارییەکانیش کراوە. تەنیا ئەوە ماوە بودجەکەی تەرخانبکرێت و دەستبکەین بە دانانی تۆڕی ئاو بۆ ماڵەکان."

لەلایەکی دیکەوە: زەردەشت ڕەفیق، وتەبێژی شارەوانی سلێمانی، لەبارەی قیرتاوکردنی کۆڵانەکانەوە گوتی: "لەسەر پڕۆژەی تۆڕی ئاوی گەڕەکەکە وەستاوین. هەرکات ئەوەیان جێبەجێکرا، ئێمەش کۆڵانەکانیان بۆ قیرتاو دەکەین."