قەڵای هەولێر نۆژەن دەکرێتەوە

ئاڤا نیوز

پڕۆژەی نۆژەنکردنەوەی قەڵای هەولێر دەچێتە قۆناغێکی نوێ، کۆمپانیایەک و ئەنجوومەنی وەزیران پاڵپشتیی دارایی بۆ پڕۆژەکە تەرخان دەکەن، بڕیاریشە لە مانگی سێی ئەمساڵ کارەکان دەستپێبکەن.

ئەوەی پێویستە بیزانیت: دکتۆر ئومێد، سەباح، سەرۆکی دیوانی ئەنجوومەنی وەزیرانی کوردستان، بە مەبەستی بەدواداچوون بۆ پڕۆژەی نۆژەنکردنەوەی قەڵای هەولێر، سەردانی کۆمیسیۆنی بوژانەوەی قەڵای کرد و پاڵپشتیی تەواوی حکومەتی بۆ پڕۆژەکە دووپات کردەوە. لەو چوارچێوەیەشدا بڕی 250 ملیۆن دینار بۆ خزمەتکردنی زیاتری قەڵا و پەرەپێدانی کەرتی گەشتیاری پیشکەشی پڕۆژەکە کرد.

لێدوانی فەرمی: یادگار محەممەد، بەرپرسی کۆمیسیۆنی بووژانەوەی قەڵای هەولێر، بە ئاڤای ڕاگەیاند: لە ماوەی ڕابردوو ڕێککەوتننامەیەکی هاوبەش لە نێوان حکومەتی هەرێمی کوردستان، کۆمپانیای کار گرووپ و ڕێکخراوی یونسکۆ بە بەهای 10 ملیۆن دۆلار واژۆ کرا. پارەکە لەلایەن کۆمپانیای کارەوە دابین کراوە و مەبەست لێی نۆژەنکردنەوەی چەند خانوویەکی شوێنەوارییە لەسەر قەڵا بۆ مەبەستی گەشتیاری، کە یونسکۆ سەرپەرشتی جێبەجێکردنی دەکات.

هەنگاوی داهاتوو: بڕیارە لە مانگی سێی ئەمساڵ کارەکانی پڕۆژەکە بە فەرمی دەستپێبکەن. سەرەتا لە نۆژەنکردنەوەی گۆڕەپانی سەرەکیی قەڵاوە دەست پێ دەکات و دواتر بەشێک لە خانووەکان دەگرێتەوە. بەپێی ڕێککەوتنەکە، تەواوی کارەکان دەبێت لە ماوەی پێنج مانگدا کۆتاییان بێت و قەڵا بۆ پێشوازیکردن لە گەشتیاران ئامادە بکرێت.