ئاڤای خەڵک؛ دانیشتووانی گەڕەکی سەروچاوەی دیانا بەهۆی نەبوونی خزمەتگوزارییەوە نیگەرانن

ئاڤا نیوز

دانیشتووانی گەڕەکی سەروچاوە لە ناحیەی دیانا، بە دەست نەبوونی خزمەتگوزارییە سەرەتاییەکانەوە دەناڵێنن و داوای چارەسەر بۆ کێشەکانیان دەکەن.

زانیاریی بەدەستهاتوو: یەکێک لە دانیشتووانی گەڕەکەکه بە ئاڤای ڕاگەیاندووە: "خزمەتگوزارییە سەرەتاییەکانمان نییە. ستوونی کارەبای گەڕەکەکەمان خۆمان دامانناوە و دارمان چەقاندووە بۆ ئەوەی کارەبامان هەبێت. ئاومان نییە و بە تانکەر ئاومان بۆ دێت، ئەمەش تێچووی زۆری هەیە. شەقام و کۆڵانەکانمان خراپن و بەتایبەت لە وەرزی زستاندا تووشی ئاستەنگی زۆر دەبین و ناتوانین بە ئاسانی هاتووچۆ بکەین."

لێدوانی فەرمی: هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە ئاڤای ڕاگەیاند: "پڕۆژە خزمەتگوزارییەکان لە هەموو ناوچەکان قۆناغ بە قۆناغ جێبەجێ دەکرێن. سەبارەت بە گەڕەکی سەروچاوەش، بڕیارمان لێداوە خزمەتگوزارییە پێویستەکانیان بۆ جێبەجێ بکەین و بەمزووانەش خۆم سەردانیان دەکەم و لەنزیکەوە گوێیان بۆ دەگرم بۆ ئەوەی کێشەکانیان چارەسەر بکەین."