پرۆژەیەکی گەورەی ئاوی خواردنەوە لە سیدەکان جێبەجێ دەکرێت

ئاڤا نیوز

لە گوندێکی سنووری قەزای سیدەکان، پرۆژەیەکی گرنگ و گەورەی ئاوی خواردنەوە بە گوژمەی 378 ملیۆن دینار جێبەجێکراوە، ئێستا پرۆژەکە 100٪ تەواو بووە.

چیرۆکی سەرەکی: لە ماوەی ڕابردوودا هەندێک شوێن و گوند و ناوچەی هەرێمی کوردستان بەهۆی وشکەساڵییەوە کێشەی کەمئاوییان بۆ دروستبوو، گوندی نزاری لە قەزای سیدەکان، لە ئیدارەی سەربەخۆی سۆران ئەو کێشەیەی هەبوو، بەڵام حکومەتی هەرێمی کوردستان لەڕێگەی جێبەجێکردنی پرۆژەیەکی گەورەی ئاوەوە کێشەکە چارەسەر دەکات.

لێدوانی فەرمی: هەژار حەکیم، بەرپرسی ڕاگەیاندن و پەیوەندییەکانی ئیدارەی سەربەخۆی سۆران بە ئاڤا میدیای ڕاگەیاند، ئێستا پرۆژەکە 100% کارەکانی تەواو بووە کە پێکهاتووە لە حەوزێکی گەورە، درێژی تۆڕەکانی ئاو لەو پرۆژەیەدا نۆ کیلۆمەتر و نیوە و هەموو پێداویستییەکانی بۆ دابین کراوە، تەنیا تۆڕی کارەبای ماوە بۆی جێبەجێ بکرێت.

زانیاریی زیاتر: پرۆژەکە بە گوژمەی 378 ملیۆن دینار لەسەر بودجەی وەزارەتی شارەوانی و گەشتوگوزار جێبەجێ دەکرێت، لە گوندی شیوان کە نزیکە لە گوندی نزاری، بە هەمان شێوە پرۆژەیەکی دیکەی ئاو جێبەجێ دەکرێت، ئەویش نۆ کیلۆمەترە و 403 ملیۆن دینار گوژمەیە.

بۆچی گرنگە: بە جێبەجێکردنی ئەو پرۆژانە ڕێگری لە چۆڵبوونی گوندەکان دەگرێت، بە تایبەتی گوندی نزاری کە ناوچەیەکی سنوورییە لە قەزای سیدەکان و زیاتر لە 200 ماڵ لێی سوودمەند دەبن.