بۆ دەرهێنانی تەرمێک لە بەغدا هانا بۆ مەلەوانێکی کورد دەبرێت

ئاڤا نیوز

ماوەی هەشت ڕۆژە تەرمی گەنجێکی 18 ساڵ لە ڕووباری دیجلە خنکاوە و تاوەکو ئێستا تەرمەکەی نەدۆزراوەتەوە، هەر بۆیە هانا بۆ گەنجێکی کورد دەهێنرێت تاوەکو هاوکارییان بکات لە دۆزینەوە. 

چیرۆکی سەرەکی: هێزە جیاوازەکانی وەزارەتی ناوخۆی عێراق و سەرایا سەلام و حەشدی شەعبی و دەیان خۆبەخش بەردەوام بەدوای تەرمەی گەنجێکدا دەگەڕێن بەڵام تاوەکو ئێستا بێ ئەنجام بووە، گەنجە خنکاوەکە ناوی حوسێن باسمە، خەڵکی شاری سەماوەیە بۆ کرێکاری چووەتە بەغدا، هەشت ڕۆژ پێش ئێستا نیوەرۆ لەگەڵ چەند هاوڕێیەکی لە ناوچەی گرێعات مەلەیان کردووە، خنکاوە.

لەلایەکی دیکەوە: کەسوکاری ئەو گەنجە هەشت رۆژە کار و کەسابەتیان لە سەماوە بەجێهێشتووە لە نزیک دیجلە خێوەتیان هەڵداوە، چاوەڕێی دەستی تیمەکان دەکەن تاوەکو تەرمی کوڕەکەیان بۆ بدۆزنەوە بەڵام هیچ ئەنجامێکی نەبووە، بۆیە هانایان زانای غەواس بردووە تا هاوکارییان بکات.

لێدوانی فەرمی: زانای غەواس هەواڵەکەی بۆ ئاڤا پشتڕاست کردەوە و وتی دەیان تەلەفۆنم بۆ هاتووە تاوەکو سەردانی بەغدا بکەم، پشتیوان بەخودا سبەی سێشەممە بەیانی زوو بەڕێ دەکەوم بۆ بەغدا و تەواوی ئەزموونی خۆم بەکاردەهێنم بۆ دۆزینەوەی تەرمەکە.

زانیاریی زیاتر:  ئەو شوێنەی گەنجەکەی تیا خنکاوە نزیکەی 18 مەتر  قووڵە، تەل و شیش و پارچەی تیژی زۆری تێدایە، لەماوەی ئەم هەشت ڕۆژەدا تاوانی نهێنی ئاشکرا بووە، تیمەکان چوار تەرمی نەناسراویان دۆزیونەتەوە کە پێشتر خنکاون یان خنکێنراون.

ئەوەی لەبارەیەوە دەگوترێت: چەند شایەتحاڵێک قسەیان بۆ ئاڤا کردووە، دەڵێن: هەرچوار تەرمەکە پیاو بوون، یەکێکیان جلوبەرگی هێزە ئەمنییەکانی لەبەردا بووە و دەست و قاچی کەلەپچەکرابوون، بەم شێوەیە خراوەتە ناو دیجلە واتا خننکێنراوە.

- یەکێکی دیکەیان تەرمی هاوڵاتییەکەی بیانی، تەرمی بەنگلادشییەک بووە.