سەرۆك بارزانی و باڵیۆزی تورکیا تاوتوێی پێکهێنانی حکومەت و هەناردەکردنەوەی نەوتی کوردستانیان کرد

ئاڤا نیوز

 

سەرۆک بارزانی لەگەڵ باڵیۆزی تورکیا لە عێراق، دوا هەنگاوەکانی پێکهێنانی حکومەت و پڕۆسەی هەناردەکردنەوەی نەوتی کوردستان لەرێگەی بەندەری جەیهانی تورکیا تاوتوێ کرد.

 

چیرۆکی سەرەکی: ئەمڕۆ سێشەممە 21-10-2025، لە پیرمام سەرۆک مسعود بارزانی پێشوازی لە ئانڵ بۆرا ئینان، باڵیۆزی تورکیا لە عێراق کرد و چەند پرسێکی تایبەت بە دۆخی عێراق و هەرێمی کوردستان و ناوچەکەیان باس کرد.

 

ڕاگەیێنراوی فەرمی: بارەگای بارزانی ڕایگەیاند، لە دیداری نێوان سەرۆک بارزانی و باڵیۆزی تورکیا لە عێراق کە ئێرمان تۆپچو، کونسوڵی گشتیی تورکیا لە هەولێریش ئامادەی بوو، باس لە بارودۆخی سیاسیی عێراق و ناوچەکە بە گشتیی و هەڵبژاردنی داهاتووی ئەنجوومەنی نوێنەرانی عێراق و پەیوەندی نێوان لایەنە سیاسییەکانی عێراق کرا.

 

پەیوەست بە هەرێمی کوردستانیش، باس لە دوا هەنگاوەکان بۆ پێکهێنانی کابینەی نوێی حکومەتی هەرێمی کوردستان و پڕۆسەی هەناردەکردنەوەی نەوتی هەرێمی کوردستان لەڕێگەی بەندەری جەیهانی تورکیا کرا.

 

لەلایەکی دیکەوە: پەیوەندیی نێوان تورکیا لەگەڵ عێراق و هەرێمی کوردستان تەوەرێکی دیکەی ئەم دیدارە بوو، هەردوولا جەختیان لە بەردەوامی و بەرەوپێشبردنی پەیوەندییەکانی نێوان هەرێمی کوردستان و کۆماری تورکیا لە هەموو بوارەکاندا کردەوە.