کۆمیسیۆن: ڕێگە نادرێت مۆبایل و کامێرا ببرێتە نێو وێستگەکانی دەنگدان

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق جەخت لەسەر بە نهێنی بەڕیوەچوونی پرۆسەی دەنگدان دەکاتەوە و ئاماژە بەوە دەدات لە ڕۆژی هەڵبژاردندا، ڕێگە بە بردنە ژوورەوەی مۆبایل یان کامێرا بۆ ناو وێستگەکانی دەنگدان نادرێت.

 

وێنە گەورەکە: بڕیارە ڕۆژی 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانی عێراقیش دڵنیایی لە بە نهێنی بەڕێوەچوونی پرۆسەکە دەدات.

 

لێدوانی فەرمی: حەسەن هادی زایر، ئەندامی تیمی ڕاگەیاندنی کۆمیسیۆنی باڵای سەربەخۆی هەڵبژاردنەکان، بە ئاژانسی هەواڵی عێراقی ڕاگەیاند، "نهێنی دەنگدان بە تەواوی مسۆگەر کراوە، چونکە ڕێگە بە بردنە ژوورەوەی مۆبایل یان کامێرا نادرێت، ئەمەش ئازادیی دەنگدان بەبێ هیچ فشارێک بە دەنگدەر دەبەخشێت".

 

لەلایەکی دیکەوە: ئەندامەکەی تیمی ڕاگەیاندنی کۆمیسیۆن دڵنیاییدا لەوەی مافی دەنگدەر پارێزراو دەبێت بەهۆی ئەو سیستمە سیانییەی (پەنجەمۆر، وێنەی دەموچاو  و گلێنەی چاو) پەیڕەو دەکرێت. 

 

دەشڵێت، بەهۆی ئەو ڕێککارانەشەوە ساختەکردن و بەکارهێنانی لەلایەن کەسانی دیکەوە سەخت دەبێت. دوای بەکارهێنانی کارتەکەش بەشێوەیەکی ئۆتۆماتیکی بۆ ماوەی 72 کاتژمێر کارتەکە لەکار دەکەوێت، ئەمەش وادەکات هیچ بەهایەکی بۆ کەسێکی دیکە نەبێت".