ئاڤای خەڵک؛ پێنج گوندی بازیان داوای چاککردنی ڕێگای گوندەکەیان دەکەن

ئاڤا نیوز

دانیشتووانی پێنج گوند لە سنووری قەزای بازیان بەهۆی خراپی و نۆژەننەکردنەوەی ڕێگاوبانەکانیانەوە ڕووبەڕووی کێشە و ئاستەنگی گەورە بوونەتەوە و داوا دەکەن دوای 20 ساڵ لە چاوەڕوانی، حکومەت بەدەم داواکارییەکەیانەوە بچێت.

چیرۆکی سەرەکی؛ دانیشتووانی گوندەکانی ئالی گۆران، هەنجیرە، ئیبراهیم ئاوا، خاڵدان و ئالیب زاوا، لە ڕێگەی ئاڤاوە پەیامێکیان ئاڕاستەی لایەنە پەیوەندیدارەکان کردووە و دەڵێن: "کێشەی هەموو کوردستانتان گەیاند و چارەسەر کرا، ئێمەش 20 ساڵە داوای چاککردنی ڕێگاوبانەکانمان دەکەین و وەڵاممان نادرێتەوە، تکایە بەهانامانەوە وەرن."

خاتوو نەجیبە، یەکێک لە دانیشتووانی گوندی هەنجیرە، وێنای سەختیی ژیانیان دەکات و دەڵێت: "لەگەڵ بارینی کەمێک باران، ڕێگاکانمان پڕ دەبن لە قوڕ و چڵپاو و چیتر بە کەڵکی هاتووچۆ نایەن. بەهۆی ئەمەوە، پاسی قوتابخانەکان و ئۆتۆمبێلی هاووڵاتییان ناتوانن هاتووچۆ بکەن، چونکە دەچەقن. ناکرێت ڕۆژانە منداڵەکانمان و خۆشمان تووشی ئەم هەموو گرفتە بین."

لێدوانی فەرمی؛ ئیسماعیل ئەحمەد، قایمقامی قەزای بازیان، لە لێدوانێکدا بۆ ئاڤا نیوز ڕایگەیاند کە ئاگاداری کێشەکەیانن و کاری پێویستیان بۆ کردووە.

 

قایمقامی بازیان وتیشی: "پڕۆژەی نۆژەنکردنەوەی ڕێگای ئەو گوندانە دەرخستەی بۆ کراوە و کارەکانی بە باشی بەڕێوەچوون. ئێستا پڕۆژەکە بەرزکراوەتەوە بۆ ئەنجومەنی وەزیران و چاوەڕێی گەڕانەوەی ڕەزامەندیی کۆتایین."

وتیشی: "کاتێک ڕەزامەندییەکە لە ئەنجومەنی وەزیران گەڕایەوە بۆ پارێزگای سلێمانی، یەکسەر تەندەری بۆ دەکرێت و ڕەزامەندیی خەرجی بۆ وەردەگیرێت. دڵنیاتان دەکەینەوە، هەرکاتێک کارە یاساییەکان تەواو بوون، بە زووترین کات دەست دەکەین بە چاککردنی ڕێگاکەیان و کۆتایی بەم کێشە چەندین ساڵەیە دەهێنین."