ڕەوەندی کوردستانی لەسەر داوای سەرۆک بارزانی کوردانی سۆڤیەت کۆدەکاتەوە

ئاڤا نیوز

کۆنفیدراسیۆنی ڕەوەندی کوردستانی، لەسەر داواکاریی سەرۆک بارزانی، کۆنفرانسێکی نێودەوڵەتی بۆ کۆکردنەوەی کوردانی یەکێتیی سۆڤیەت لە پێناو هاندانیان بۆ پاراستنی زمان و کولتووری کوردی ساز کرد.

چیرۆکی سەرەکی: ڕۆژی یەکشەممە 19-10-2025، بە بەشداریی نووسەران و ئەکادیمیستانی کوردستانی، دووەمین کۆنفڕانسی نێودەوڵەتیی کوردانی قەوقاز لە شاری تبلیسی پایتەختی جۆرجیا لە ژێر ناوی "ڕۆڵی کوردانی قەوقاز لە پرۆسەی بنیاتنانی نەتەوەییدا " بەڕێوەچوو.

لێدوانی فەرمی: قەهرەمان عوسمان، بەرپرسی نووسینگەی شیفا بارزانی، سەرپەرشتیاری گشتیی ڕەوەندی کوردستانی بە ئاڤا میدیای ڕاگەیاند، کۆنفیدراسیۆنی ڕەوەندی کوردستانی، ساڵانە کۆنفرانسێک بۆ کوردانی یەکێتیی سۆڤیەت بەمەبەستی کۆکردنەوەیان لەپێناو هاندانیان بۆ پاراستنی زمان و کولتووری کوردی ساز دەکات.

- ئەوە یەکەم کۆنفڕانسی نێودەوڵەتیی بوو کە لەلایەن کۆنفیدراسیۆنی ڕەوەندی کوردستانی و بارەگای بارزانی بەڕێوەبچێت، بەڵام ساڵی پێشوو کوردانی ئەوێ خۆیان کۆنفرانسێکیان ڕێکخستبوو.

- کۆنفڕانسەکە لەبارەی "ڕۆڵی کوردانی یەکێتیی سۆڤیەت یاخود قەوقازیا بوو لە نەتەوەسازیدا" 

لە کۆنفرانسەکەدا چی باس کراوە؟

لە کۆنفرانسەکە زیاتر باس لەوە کرا، چۆن نەتەوەسازی و هەستی نەتەوەسازی لە یەکێتیی سۆڤیەتی پێشوو دەستیپێکردووە، زۆرینەی ئامادەبووان هاوڕا بوون لەسەر ئەوەی کە هاتنی بارزانیی نەمر و هەڤاڵانی بۆ یەکێتیی سۆڤیەت هاندەر و داینەمۆی دروستبوونی نەتەوە بووە لە یەکێتی سۆڤیەت و کوردان لەوێ هەستیان بە کوردایەتی کردووە.

هاوکات، هاتنی بارزانیی نەمر سەرەتای دروستکردن و وەرچەرخانی گەورە بووە بۆ کوردانی سۆڤیەت، بۆ ئەوەی کوردەکانی ئەوێ هەست بکەن کە کوردن و جۆش و خرۆشی نەتەوەییان لەلا هەبێت، ئێستاشی لەگەڵدا بێت لە کوردایەتی بەردەوامن و ماوەی سێ ساڵ دەبێت بە زمانێکی پاراوی کوردیی زۆر جوان قسە دەکەن کولتووری خۆیان تا ئاستێکی زۆر پاراستووە، کۆنفیدراسیۆنی ڕەوەندی کوردستانیش هەوڵ دەدات ئەو کولتوورەیان پارێزراو بێت.

مەبەست و ئامانجی کۆنفڕانسەکە:-

- پشتگیری لە هەرێمی کوردستان بکرێت، وەکو تاکە کیانێکی دانپێنراوی کوردستانی و تاکە ڕووناکی بۆ دامەزراندنی وڵاتێکی سەربەخۆی کوردستان.

- گرنگی بە زمانی کوردی بدرێت لە وڵاتانی قەوقازیا بە گشتی، چ لەڕێگەی خولی پەروەردەیی کە بەشێوەیەکی ئۆنلاین بکرێتەوە، چ لەڕێگەی فیزیکی بکرێت.

- هانی گەنجان بدرێت بچنە ناو دامەزراوە فەرمییەکانی ئەو وڵاتانە، تاوەکو لۆبی بۆ کوردستان بکەن.

- لە ڕاسەر ڕاسپاردەی سەرۆک بارزانی، کوردستانیانی دیاسپۆرا، پابەند و پێداگری یاسا و ڕێسای وڵاتەکانیان بن کە لێی دەژین و دوور بن لە  بیروباوەڕی توندڕەوی و سیاسی و ئیسلامی و خزمەتی ئەو وڵاتانە بکەن.

ئەوەی پێویستە بیزانیت: لە مانگی 12ی ساڵی 2021 لەسەر داواکاریی سەرۆک بارزانی، دیدگا و بۆچوونی سەرۆک بارزانی بۆ یەکخستنی کوردانی دیاسپۆرا بە کرداری جێبەجێ کراوە و کۆنفیدراسیۆنی ڕەوەندی کوردستانی یەکەم کۆبوونەوەی خۆی بە ئامادەبوونی سەرۆکوەزیران مەسرور بارزانی دەستپێکرد.

ئەمەش بزانە: کۆنفیدراسیۆنی ڕەوەندی کوردستانی لە 22 فیدراسیۆن و 104 کۆمەڵە و زیاتر لە 40 ناوەند لە هەموو دونیا پێکدێت، هەروەها 4 فیدراسیۆنی نێودەوڵەتیشی لەگەڵدایە.