ئاڤای خەڵک؛ قوتابیانی گوندی قەرەناز لە بەردەڕەش سێ ساڵە بێ قوتابخانەن

ئاڤا نیوز

دانیشتووانی گوندی قەرەنازی سەر بە قەزای بەردەڕەش، ناڕازین کە سێ ساڵە قوتابییەکانیان بێ بینای خوێندن ماونەتەوە. بەپێی وتەی دانیشتووان، 180 قوتابیی گوندەکە ناچارن ڕۆژانە زیاتر لە سێ کیلۆمەتر ببڕن و بچن بۆ گوندی خەرابە یاسین بۆ خوێندن.

زانیاریی بەدەستهاتوو: بەڕێوەبەری قوتابخانەکە بە ئاڤای ڕایگەیاندووە، سێ ساڵ پێش ئێستا بەهۆی کۆنی و خراپیی بیناکەوە داوای چۆڵکردنیان کردووە، بەڵام دوای چۆڵکردن، بینای نوێ دروست نەکراوە.

لێدوانی فەرمی: نیزام یاسین، بەڕێوەبەری پەروەردەی بەردەڕەش، بە ئاڤای گوت: "ڕێکارەکانی دروستکردنی بینا نوێکە هەمووی تەواو بوون، بەڵام لەبەر نەبوونی پارە دروست نەکراوە."

ناوبراو ئاماژەی بەوەشدا کە بڕیاردراوە بۆ ئەمساڵ هەشت کابینە لە گوندەکەدا دابنرێت، تاوەکو بینا نوێکە دروست دەکرێت. دڵنیایی دایە دانیشتووان کە "بەمزووانە کابینەکان دادەنێین و قوتابیان لە گوندەکەی خۆیان درێژە بە خوێندن دەدەن."