لە شەش مانگدا لە هەرێمی كوردستان 1469كەس بە تۆمەتی ماددەی هۆشبەر دەستگیر كراون

ئاڤا نیوز

 

بەپێی ئاماری بەڕێوەبەرایەتیی گشتیی نەهێشتنی ماددە هۆشبەرەكان و دەزگای ئاسایشی هەرێمی كوردستان لە سەرتاسەری هەرێمی كوردستان لە ماوەی شەش مانگی ئەمساڵدا 1469 كەس بە تۆمەتی ماددەی هۆشبەر دەستگیر كراون.

 

لێدوانی فەرمی: ئەركان بیبانی، گوتەبێژی بەڕێوەبەرایەتیی گشتیی نەهێشتنی ماددە هۆشبەرەكان بە ئاڤا میدیای ڕاگەیاند: لە شەش مانگی ئەمساڵدا لە هەردوو پارێزگای هەولێر و دهۆك، 949 تۆمەتبار دەستگیركراون لەو ژمارەیە 409 كەسیان بەكارهێنەر و 540 كەسیشیان بازرگان بوونە، هاوكات هەر لەو ماوەیەدا 453 كیلۆگرام ماددەی هۆشبەر و 70 كیلۆگرام حەبی كپتاگۆن هەشت هەزار و 505 شیت حەبی جۆراوجۆر دەستیان بەسەردا گیراوە.

 
زانیاریی زیاتر: هەر لە شەش مانگی ئەمساڵدا، بەپێی ئامارێكی دەزگای ئاسایشی هەرێمی کوردستان كە دەست ئاڤا كەوتووە،  لە سنووری پارێزگای سلێمانی، 520 تۆمەتباری ماددەی هۆشبەر دەستگیر كراون و دەستیش بەسەر 500 كیلۆگرام ماددەی هۆشبەردا گیراوە.

قووڵتر: گوتەبێژی بەڕێوەبەرایەتیی نەهێشتنی ماددە هۆشبەرەكان ڕاشیگەیاند: كابینەی نۆیەمی حكومەت بەرەنگاربوونەوەی ماددەی هۆشبەری لەپێشینەی كارەكانی داناوە، لە ساڵی 2022ـەوە دەستمان بە هەڵمەتێكی زۆر چڕ و فراوانی دەستگیركردنی بازرگانانی ماددەی هۆشبەر كرد، هەروەها بە چڕی كارمان لەسەر  ئەو ڕێڕەوانە كرد كە ماددەی هۆشبەریان لێ دەگواسترێتەوە.

 
گوتیشی: چەندین تۆڕی بازرگانیی نێودەوڵەتیمان لێك هەڵوەشاندووەتەوە و سەرجەم ئەندامەكانیانمان دەستگیر كردووە، چالاكییەكانی ئێمە جگە لە هەرێمی كوردستان و عێراق پەڕیونەتەوە دەرەوەی وڵاتیش، توانیومانە چەندین تۆمەتبار لە دەرەوەی وڵات دەستگیر بكەین و بیانهێنینەوە لە هەرێمی كوردستان دادگاییان بكەین.

 
ئەوەی پێویستە بیزانیت: هەر بەپێی ئامارێكی بەڕێوەبەرایەتیی گشتیی نەهێشتنی ماددە هۆشبەرەكان له ساڵى 2022 تا ناوەڕاستی ئەمساڵ تەنیا لە سنووری پارێزگاکانی هەولێر و دهۆک زیاتر لە شەش هەزار و 700 تۆمەتبار دەستگیر كراون، لەو ژمارەیەش سێ هەزار و  306 تۆمەتباریان بازرگانی ماددەی هۆشبەر بوونە.