وادەی گەڕانەوەی 40 کۆچبەری کورد و عێراقی لە لیبیاوە ئاشکرا دەکرێت

ئاڤا نیوز

 

هەڵسوڕێنەری کاروباری باڵیۆزخانەی عێراق لە لیبیا ڕایگەیاند، ڕۆژی شەممەی داهاتوو 40 کۆچبەری عێراقی بۆ وڵات دەگەڕێنەوە و هەماهەنگی تەواویشیان بۆ گەڕانەوەی تەرمی ئەو کۆچبەرە کوردە کردووە کە لە چەند ڕۆژی ڕابردوودا لە ناوەندێکی ڕاگرتنی کۆچبەران لە تەڕابلووس گیانی لەدەست دا.

 

وێنە گەورەکە: ماوەیەکە کۆچی گەنجانی هەرێمی کوردستان لەڕێگەی تونس و لیبیاوە بۆ وڵاتانی ئەوروپا چڕبووەتەوە، لە لیبیاش بەهۆی نەبوونی حکومەتێکی یەکگرتوو و بوونی ژمارەیەک گرووپی چەکداریی نافەرمی مەترسی لەسەر گیانی کۆچبەران زیاترە، بۆیەش بەرپرسانی باڵیۆزخانەی عێراق لەو وڵاتە داوا لە خێزانەکانی عێراق و کوردستان دەکەن ڕێگەنەدەن کەسوکاریان کۆچی نایاسایی بکەن چونکە مەترسی لەسەر گیانیان دروست دەبێت و  توشی کێشەی یاسایش دەبنەوە.

 

ڕاگەیێنراوی فەرمی: ئەحمەد سەحاف، هەڵسوڕێنەری کاروباری باڵیۆزخانەی عێراق لە لیبیا لە ڕاگەیێنراوێکدا ئاماژەی بەوەشکردووە، ڕۆژی چوارشەممە سەردانی ناوەندی ڕاگرتنی کۆچبەرانی لە تەرابلووس کردووە و ڕێکارەکانی گواستنەوەی تەرمی ئەو گەنجەی خەڵکی ڕانیەیان دەستپێکردووە کە لە چەند ڕۆژی ڕابروودا لەناوەندەکەدا بەهۆی جەڵتەی دڵەوە گیانی لەدەستدا.

 

ئاماژەی بەوەشکردووە، لە ناوەندەکەدا خواردن، دەرمان و بلیتی گەشتی گەڕانەوەیان بۆ عێراق  بە کۆچبەرەکان داوە، بڕیاریشە ڕۆژی شەممەی داهاتوو (25ی تشرینی یەکەم) کۆچبەرەکان بۆ وڵات بگەڕێنەوە.