دوای سزاكەی ئەمریكا فلای بەغداد داوای بەڵگە دەكات

ئاڤا دیجیتاڵ

دوای چەند كاتژمێرێك لە سزاكانی وەزارەتی خەزێنەی ئەمریكا، كە بەسەر كۆمپانیای "فلای بەغداد" سەپاندی، بەتۆمەتی ئەوەی چەكی گواستووەتەوە بۆ ئێران و سووریا، ئەو كۆمپانیایە داوای بەڵگە دەكات و چەند گەشتێكی لە فڕۆكەخانەی بەغدا هەڵوەشاندەوە.

چیرۆكە سەرەكییەكە: دوای ئەوەی ئەمڕۆ وەزارەتی خەزێنەی ئەمریكا كۆمپانیای فلای بەغدادی خستە لیستی سزاكانیەوە، كە هاوكاری سووپای پاسدارانی ئێرانی لەگەڵ میلیشیا چەكدارەكانی  لە عێراق و سووریا و لوبنان، لە تۆڕە كۆمەڵایەتیەكان گرتەی ڤیدیۆیی دوو گەشتیار بڵاوكرایەوە كە لە فڕۆكەخانەی بەغداد گیریان خواردووە بەهۆی ئەوەی گەشتەكانیان هەڵوەشاوەتەوە.

لەلایەكی دیكەوە: كۆمپانیای فلای بەغداد دەڵێت "گەشتەكانمان بەردەوامە و بەهیچ هۆكارێك ڕای ناگرین".

كۆمپانیای فلای بەغداد تووشی شۆك بوو بە بڕیارەكەی وەزارەتی خەزێنەی ئەمریكا، كە تۆمەتی ئەوەی ئاڕاستەكردووە چەكی گواستووەتەوە بۆ سووریا و هاوكاری ئەو گروپانەی كردووە كە لەلایەن ئەمریكاوە خراونەتە لیستی تیرۆرەوە.

لێدوانی فەرمی: كۆمپانیاكە ڕەتیدەكاتەوە ئەوكارەیان كردبێت و لە ڕاگەیێندراوێكدا دەڵێت " پشتی بە هیچ بەڵگەیەكی ماددی و مەعنەوی نەبەستووە و ساڵانێكە لەژێر سەرپەرشتی حكومەتی عێراق كاردەكەین، نوێنەرایەتیمان هەیە لە دەسەڵاتی فڕۆكەوانی عێراق و وەزارەتی گواستنەوە".

كۆمپانیای فلای بەغداد داوای بەڵگە لەوەزارەتی خەزێنەی ئەمریكا دەكات و دەشڵێت " سكاڵا تۆمار دەكەین و داوای قەرەبوو دەكەینەوە"، لەكاتێكدا وەزارەتی خەزێنەی ئەمریكا دەڵێت ئەو كۆمپانیایە ساڵانێكە هاوكاری فەیلەقی قودسی سوپای پاسداران دەكات و هاوكاری ئەو میلیشیایانەشی كردووە كە لەئێرانەوە نزیكن، لەوانەش پاسەوانی كۆماری سوریا و حزبووڵڵای لوبنان و حزبوڵڵای عێراق و كەتائیبی ئەبو فەزڵ عەباس.