میترۆ داوای لێپێچینەوە لە هێرشكەرانی سەر تیمی ئاڤا میدیا و پایتەخت میدیا دەكات

ئاڤا نیوز

لە شاری سلێمانی هێرش كرایە سەر تیمی میدیایی ئاڤا میدیا و پایتەخت میدیا و وێنەگرێكی ئاڤا ئازاری پێدەگات و سەنتەری میترۆ بۆ داكۆكیكردن لە مافی ڕۆژنامەوانانیش وێڕای ئیدانەكردنی هێرشەكە داوای دەستبەجێ لێپێچینەوە لە بكەرانی دەكات.

چیرۆكی سەرەكی: ئەمڕۆ پێنجشەممە، 23-10-2025، لە کاتی ڕووماڵکردنی گردبوونەوەی ناڕەزایەتیی دانیشتووانی گوندی گۆپاڵەی سەر بە ناحیەی بازیان لە سلێمانی، بەهۆی تێکەڵبوونی ئاوی خواردنەوەیان بە ئاوەڕۆی ناوچەكە، لەلایەن هێزێكی ئەمنیی بەردەقارەمانەوە هێرش دەکرێتە سەر هەردوو تیمی میدیایی ئاڤا و پایتەخت، لە ئەنجامدا کامێرامانی ئاڤا میدیا ئازار بەر قۆڵی گەیشت.

ڕاگەیێنراوی فەرمی: سەنتەری میترۆ بۆ داكۆكیكردن لە مافی ڕۆژنامەوانان ڕایگەیاند: ئیدانەی مامەڵەی هێزی ئەمنیی شارۆچکەی بەردەقارەمان لەگەڵ خۆپیشاندەران و ڕۆژنامەنووسانی ئاڤا میدیا و پایتەخت دەکەین، داوای دەستبەجێ لێپێچینەوە لە بکەرانی ئەم کارە دەكەین و نابێت لە سزا دەربازییان بێت.

زانیاریی زیاتر: سەنتەری میترۆ ئاماژەی بە ئەوەش داوە كە هێزەکە تەنیا بە هێرشکردنە سەر تیمی ئاڤا و پایتەخت نەوەستاون و لەگەڵ دانیشتووانی گردبووەوەش ڕووبەڕووبوونەتەوە و ئازاریان داون.

ئەوەی پێویستە بیزانیت: دوای هێرشکردنە سەر تیمی هەردوو میدیاکە، دەست بەسەر مۆبایل و کەلوپەلی ڕۆژنامەوانییاندا گیرا و پێیان گوتن بڕۆن لە بنکەی ئاسایشی باینجان وەری بگرنەوە، پاش چوونیان بۆ وەرگرتنەوەی کەلوپەلەکانیان، یەك کاتژمێر کارمەندانی هەردوو تیمەکە ڕاگیران و ڕێگرییان لێ كرا بچنە دەرەوە یاخود مۆبایل بەکاربهێنن.