نێچیرڤان بارزانی: بە یەك ملیۆن دەنگ نەیارانمان بێ ئومێد دەكەین

ئاڤا نیوز

نێچیرڤان بارزانی، جێگری سەرۆكی پارتی دیموكراتی كوردستان ڕایگەیاند، بۆ دواڕۆژێكی گەشتر و ئارامتر، سەركەوتنی پارتی لەم هەڵبژاردنە پێویستە، دووپاتیشی كردەوە، لەنێو پەرلەماندا شەڕی چەسپاندنی دەستوور دەكەن و هەروەك چۆن بەرگریی لە مافەكانی خەڵكی كوردستان دەكەن، بەهەمان شێوە بەرگریی لە مافی هەموو عێراقییەكان دەكەن.

چیرۆكی سەرەكی: ئەمڕۆ هەینی 24-10-2025 لە دهۆك، بە ئامادەبوونی نێچیرڤان بارزانی، جێگری سەرۆكی پارتی دیموكراتی كوردستان، ئاهەنگی جەماوەری بۆ ناساندنی كاندیدەكانی لیستی 275 لە سنووری پارێزگای نەینەوا بەڕێوەچوو.

پەیامی فەرمی: نێچیرڤان بارزانی وتارێكی پێشكەشكرد و لەمیانی وتارەكەیدا ڕایگەیاند، پارتی پێویستە حیزبی یەكەم بێت لە پارێزگای نەینەوا، چونكە هەبوونێكی بەهێزی پارتی لە بەغدا، زامنی هاوسەنگی و هاوبەشی دەكات ئەوەش لەبەرژەوەندی هەموو عێراقە.

بەشێك لە وتەكانی جێگری سەرۆكی پارتی دیموكراتی كوردستان بەگوێرەی تەوەرەكان:

گرنگی پارێزگای نەینەوا لە هەڵبژاردن:

- نەینەوا بۆ هەرێمی كوردستان و عێراق گرنگە.
- سنووری پارێزگای نەینەوا مەیدانی گەرمی ڕكابەرییە.
- پارتی پێویستە حیزبی یەكەم بێت لە نەینەوا.
- بەرەو سەركەوتنێكی مەزنی پارتی هەنگاو دەنێین.
- ئەركێكی قورستان لەسەرشانە؛ بە هەمووتان لیستی پارتی سەربخەن.
- بە یەك ئیڕادە و یەك دەنگ، دەنگ بە پارتی بدەن.
- ناهێڵین هیچ كاتێك برایەتیی كورد و عەرەب تێكبچێت.
- پێویستە بەرامبەر خوێنی شەهیدانمان وەفادار بین.

بۆچی گرنگە پارتی یەكەم بێت:

- هەبوونی بەهێزی پارتی لە بەغدا، لە بەرژەوەندی هاوسەنگی و هاوبەشیە.
- هەبوونێكی بەهێزی پارتی بۆ بەرژەوەندیی هەموو عێراقە.
- پێشێلكردنی دەستوور، عێراقی بەرەو وێرانكاری برد.
- ناوەڕۆكی فیدڕاڵی لە عێراق جێبەجێ ناكرێت.
- سیستەمێكی مەركەزی لە عێراق پەیڕەو دەكرێت.
- پارتی خۆی بۆ چەسپاندنی دەستوور ئامادە دەكات.
- پێویستە دەستوور وەك خۆی جێبەجێ بكرێت.
- خەباتمان لەنێو پەرلەمان بۆ جێبەجێكردنی دەستوور دەبێت.
- جێبەجێكردنی دەستوور لە پێناو مافی هەموو عێراقییەكانە.  
- بەهێزبوونی هەرێمی كوردستان بە واتای بەهێزبوونی عێراق دێت.
- فەلسەفەی پارتی لەپێناو پێكەوەژیانی ئاشتیانە و پەیڕەوكردنی دیموكراسیەتە.
- بۆ دواڕۆژێكی گەشتر و ئارامتر سەركەوتنی پارتی پێویستە.
- بەشێك لە لایەنە سیاسییەكان هەوڵ بۆ دروستكردنی دووبەرەكی دەدەن.
- ئەزموون سەلماندوویەتی لە هەر شوێنێك پارتی بەهێز بێت پێكەوەژیان بەهێزە.
- پارتی لە هەر كوێیەك بێت ئاوەدانی لەوێیە.

خەباتی سەرۆك بارزانی و پێشمەرگە بۆ نەینەوا:

- دوای پەلاماری داعش، دوو ملیۆن ئاوارە پەنایان بۆ هەرێمی كوردستان هێنا.
- سەرۆك بارزانی مزگێنی سەركەوتنی بە شنگالییەكان دا ئینجا لە چیای شنگال هاتەخوارەوە.
- قارەمانی پێشمەرگە ئیڕادەی هێزە عێراقییەكانیشی لە تێكشكاندنی داعش بەهێز كرد.
- دەمانەوێت لە شنگال یاسا سەروەر بێت و حوكمڕانیەكی شارستانی هەبێت

پەیامی نێچیرڤان بارزانی بۆ كاندیدەكان:

- داوا لە كاندیدەكان دەكەم پەیامی پارتی وەك خۆی بگەیێننە بەغدا.
- كاندیدەكانی پارتی خزمەتكاری خەڵكن.
- بە یەك ملیۆن دەنگ، نەیارانمان بێ ئومێد دەكەین.