40 کۆچبەر لە لیبیاوە دەگەڕێنرێنەوە کوردستان و ژمارەیەک کۆچبەری دیکەش دۆزرانەوە

ئاڤا نیوز

سبەی شەممە ڕێکارەکانی ناردنەوەی ئەو کۆچبەرانە دەستپێدەکات کە ماوەیەکە لە تەڕابڵوس دەستگیر کراون. لەگەڵ ئەوەشدا ڕۆژی پێنجشەممە ژمارەیەک کۆچبەری دیکە دۆزراونەتەوە کە سەرجەمیان لە پارێزگای سلێمانییەوە چوونەتە لیبیا و ئێستا لە زیندانن.

وێنە گەورەکە: ئەگەرچی کۆچ دیاردەیەکی جیهانییە، بەڵام ماوەی چەند ساڵێکە ژمارەی کۆچبەران لە ڕۆژهەڵاتی ناوەڕاست بۆ وڵاتانی ئەوروپا زیادیکردووە. ئێستا بەشێک لە گەنجان بۆ گەیشتن بە ئەوروپا ڕێگای لیبیا بەکاردەهێنن، بەڵام بە یەکێک لە ڕێگا مەترسیدارەکان دەناسێنرێ.

لێدوانی فەرمی: ئەحمەد سەحاف، هەڵسوڕێنەری باڵیۆزخانەی عێراق لە تەرابڵوس بە ئاڤای وت، سبەی شەممە 40 کۆچبەر لە تەرابڵوسەوە بەرەو ئیستانبووڵ بەڕێدەخرێن و لەوێشەوە بەرەو فڕۆکەخانەی نێودەوڵەتیی هەولێر دەگەڕێنرێنەوە.

ئەحمەد سەحاف دەشڵێت: دوێنێ 23 کۆچبەری دیکە لە یەکێک لە بنکەکانی ناوەندی نەهێشتنی کۆچی نایاسایی لە ڕۆژهەڵاتی تەرابڵوس کە سەرجەمیان خەڵکی پارێزگای سلێمانین دۆزراونەتەوە و هەمان ڕۆژ سەردانم کردن و تەندروستییان باشە و دەستکراوە بە ڕێوشوێنێ گەڕانەوەیان بۆ هەرێمی کوردستان.

زانیاریی زیاتر: هەڵسوڕێنەری باڵیۆزخانەی عێراق دەڵێت: دەستمان کردووە بە ڕێوشوێنێ گەڕانەوەی تەرمی ئەو گەنجەی کە رۆژی 16-10-2025 گیانی لەدەستدا بوو.