لە کاتی بانگەشەی هەڵبژاردن لە پردێ ئاڵۆزی دروستبوو

ئاڤا نیوز

ئەمشەو لە ناحیەی پردێ لە کاتی بانگەشەی هەڵبژاردن گرژی لەنێوان چەند گرووپێک و لایەنگرانی پارتی دروست بوو، بەشێک لە دانیشتووانی پردێ گردبوونەتەوە و داوا دەکەن ئەو گرووپە نەیەنەوە گەڕەکە کوردییەکان.

چیرۆکی سەرەکی: بانگەشەی هەڵبژاردنی لایەنەکان تا دێ گەرمتر دەبێ، ئەمشەو لە ناحیەی پردێ گروپێک لە گەڕەکی کوردستان، ئاڵای پارتی و وێنەی کاندیدانیان لێ کردەوە و خەڵک ڕووبەڕوویان بوونەوە.

زانیاریی پەیامنێر: دیار محەممەد، پەیامنێری ئاڤا لە شوێنی ڕووداوەکەیە و دەڵێت: ڕووداوەکە بە تەقەکردن و لێکردنەوەی ئاڵای پارتی دەستیپێکرد، لایەنگرانی پارتی ڕووبەڕوویان بوونەوە، گرووپەکە هەڵاتن و لەدوای خۆیان ئۆتۆمبێلێک و ماتۆڕێکیان جێهێشت.

بەوتەی دیار محەممەد، لەم ڕووداوە هیچ کەسێک بریندار نەبووە و هێزێکی زۆر لە شوێنی ڕووداوەکەن و داوادەکەن خەڵک ناوچەکە چۆڵ بکات.

زانیاریی بەدەستهاتوو: ئاڤا زانیویەتی دەروازەی هاتنە ناوەوە و چوونە دەرەوەی پردێ داخراوە و هێزە ئەمنییەکان ڕێگا بە تێپەڕبوونی کەس نادەن.