كاتی گەیشتنی پارەی مووچەی مانگی هەشتی فەرمانبەران ئاشكرا دەکرێت

ئاڤا نیوز

سەرچاوەیەكی لە بانكی ناوەندیی عێراق وادەی گەیشتنی پارەی مووچەی مانگی هەشتی فەرمانبەرانی هەرێمی كوردستان ئاشكرا دەكات و دەڵێت: تەنیا یەک ڕێككار ماوە ئەنجام بدرێت.

چیرۆکی سەرەکی: دوای چاوەڕوانییەکی زۆر،  نووسراوی فەرمی خەرجکردنی مووچەی مانگی هەشتی فەرمانبەرانی کوردستان لەلایەن ئەنجوومەنی وەزیرانی عێراقەوە دەرکرا. بەپێی زانیارییەکان، ئەم نووسراوە بە شێوەیەکی فەرمی و لە ڕێگای پۆستەوە بۆ وەزارەتی دارایی عێراق نێردراوە. جگە لەوەش، وێنەیەکی نووسراوەکە لە ڕێگای واتسئەپەوە بۆ تەیف سامی، وەزیری دارایی عێراق نێردراوە بۆ خێراکردنی کارەکان.

زانیاریی بەدەستهاتوو: بەهۆی درەنگ گەیشتنی نووسراوەكە و تەواوبوونی دەوامەوە، ڕۆژی پێنجشەممەی ڕابردوو نەتوانرا ڕێككارەكانی ناردنی پارە ئەنجام بدرێت، ڕۆژانی هەینی و شەممەش لە فەرمانگەكانی حكومەت پشووە و چاوەڕوان دەكرێت سبەی دەست بە ڕێككارەكانی ناردنەكە بكرێت.

لێدوانی فەرمی: سەرچاوەیەك لە لقی هەولێری بانكی ناوەندیی عێراق بە ئاڤا میدیای ڕاگەیاند: دوای گەیشتنی نووسراوی ئەنجوومەنی وەزیرانی عێراق بۆ وەزارەتی دارایی عێراق، سەبارەت بە ناردنی پارەی مووچەی مانگی هەشتی فەرمانبەرانی هەرێمی كوردستان، تەنیا یەك ڕێككار ماوە بۆ ناردنی پارەكە.

زانیاریی زیاتر: بەپێی گوتەی ئەو سەرچاوەیە، وەزارەتی دارایی وردبینی لیستی مووچە دەكات پاشان پارەكە بە سیستەمی خەرجكردنی ڕاستەوخۆ دەخاتە سەر ژمارە حیسابی وەزارەتی دارایی حكومەتی هەرێمی كوردستان لە لقی هەولێری بانكی ناوەندیی عێراق.

ئەمەش بزانە: ئەو سەرچاوەیە ئەوەشی خستە ڕوو كە بەهۆی ئەو ڕێككارەی كە ماوە ئەنجام بدرێت، بە ئەگەری زۆرەوە دووسبەی پارەكە دەنێردرێت.