لە بانە کۆڵبەرێک کوژرا و دووانی دیکەش بریندار كران

ئاڤا نیوز

 

کۆڵبەرێک لە ناوچە سنوورییەکانى شاری بانە لە ڕۆژهەڵاتی کوردستان، بە تەقەی ڕاستەوخۆی هێزی پاراستنی سنووری ئێران گیانی لەدەست دا و دوو هاونیشتمانیی دیکەش بە سەختی بریندار بوون.

 

وێنە گەورەكە: بەشێك لە هاونیشتمانیانی ڕۆژهەڵاتی كوردستان، بەهۆی سەختی ژیان و نەبوونی بژێوی ژیان، لە ناوچە سنوورییەكان خەریكی كاری كۆڵبەرین و بە كۆڵ كەلوپەلی بازرگانەكان لە ناوچە سنوورییەكان دەگوازنەوە لەبەرامبەر وەرگرتنی بڕە پارەیەكی كەم، كەچی بەردەوام لەلایەن هێزەكانی پاسەوانی سنوور سەر بە سوپای پاسداران بەئامانج دەگیرێن و دەدرێنە بەر دەستڕێژی گوللە.

 

زانیاریی بەدەستهاتوو: بەپێی زانیارییەکانی ئاڤا میدیا، شەوی ڕابردوو هێزەکانی پاراستنی سنووری ئێران لە نزیک سنووری کانی سێف، ئۆتۆمبێلی ژمارەیەک کۆڵبەریان داوەتە بەر دەسڕێژی گوللە، لە ئاكامدا کۆڵبەرێک بە ناوی "ئیبراهیم پیرانزاد" کە شۆفێری ئۆتۆمبێلەکەش بووە، کوژراوە. لەو ڕووداوەدا دوو کۆڵبەری دیکەش بریندار بوون و، دۆخی تەندروستی یەکێك لە بریندارەكان ناجێگیرە و ئێستا لە بەشی چاودێریی چڕی نەخۆشخانەی سەڵاحەددینە لە شاری بانە.

 

زانیاریی زیاتر: ئیبراهیم پیرانزاد، خەڵکی گوندی بێلوێی سەر بە شاری بانە، تەمەنی نزیکەی 30 ساڵە، خێزاندارە و منداڵیشی هەیە، بەپێی زانیارییەکان كۆڵبەرەكان لەسەر هێڵی سنووریش نەبوون کە تەقەیان لێکراوە.

 

ئەمەش بزانە: کەسوکاری کۆڵبەرە کوژراوەکە، شەوی هەینی بۆ دەربڕینی ناڕەزایەتی، تەرمەکەیان بردووەتە بەردەم قایمقامیەتی بانە، بەڵام هێزی پۆلیس بەزۆر بڵاوەیان بە خەڵک کردووە.

 

ژمارەكان وا دەڵێن: بەپێی ڕاپۆرتی کۆڵبەرنیوز، لە شەش مانگی ڕابردوودا؛ 17 کۆڵبەر بەهۆکاری جیاواز گیانیان لەدەستداوە و 20ـی دیکەش بریندار بوون.