بەهۆی باڵیۆزخانەکەی لە بەغدا سکاڵا لەسەر فەرەنسا تۆمار دەکرێت

ئاڤا نیوز

دوو برای جوو، سکاڵایەکی یاسایی دژی فەرەنسا تۆمار دەکەن و داوای قەرەبووی بڕی 21.5 ملیۆن یۆرۆ دەکەن، پارێزەرەکەشیان دەڵێت "باڵەخانەی باڵیۆزخانەی فەرەنسا لە بەغدا، موڵکی خێزانی ئەو دوو برایە بووە پێش ئەوەی دەسەڵاتدارانی عێراق دەستی بەسەردا بگرن."

چیرۆکی سەرەکی: لە ساڵی 1964، باڵیۆزخانەی فەرەنسا لە عێراق گرێبەستی کرێی ئەو موڵکەی لەگەڵ کەسێکی جوو واژۆ کردووە، بەڵام لە ساڵانی دواتردا، دەسەڵاتدارانی عێراق دەستیان بەسەر موڵک و ماڵی ئەو جووانەدا گرت کە وڵاتەکەیان جێهێشتبوو، لە دوای ئەوەش دەسەڵاتدارانی فەرەنسا گرێبەستێکی نوێیان لەگەڵ حکومەتی عێراق واژۆ کردووە.

لێدوانی فەرمی: جان پیێر مینیار، پارێزەری دوو برا جووەکە کە خاوەندارێتی ئەو موڵکە دەکەن، ڕایگەیاند: موڵکایەتی باڵەخانەکە دەگەڕێتەوە بۆ هەردوو برا عەزرا و خودوری لاوی، کە دوو عێراقی جوون و لە چلەکانی سەدەی ڕابردوودا لەگەڵ شەپۆلی فراوانی کۆچکردنی جووەکان وڵاتەکەیان جێهێشتووە.

زانیاریی زیاتر: پارێزەری دوو براکە لە سکاڵاکەیدا داوای 21.5 ملیۆن یۆرۆ وەک کرێی وەرنەگیراو لە ساڵی 1969ـەوە تاوەکو ئێستا کردووە و دەڵێت" فەرەنسا باڵەخانەیەک داگیر دەکات کە موڵکی ئەوان نییە".

ئەمەش بزانە: سەرچاوەیەک لە وەزارەتی دەرەوەی فەرەنسا ڕوونیکردەوە، ئەوان ناتوانن لەسەر دۆسیەیەکی یاسایی بەردەوام لێدوان بدەن و تا ئێستاش هیچ لێدوانێکی فەرمی لە لایەن دەسەڵاتدارانی عێراق لەسەر ئەم پرسە نەدراوە.