لەسەر وتنەوەی سروود بەڕێوەبەر و یاریدەدەری قوتابخانەیەكی ڕۆژهەڵات سزا دران

ئاڤا نیوز

لە ڕۆژهەڵاتی کوردستان لەسەر گوتنەوەی سروودێک بۆ یادی کیمیابارانی هەڵەبجە لەلایەن قوتابییانی قوتابخانەیەک، بەڕێوەبەر و یاریدەدەرەکەی سزا دران و بەڵێننامەیان پێ پڕ کراوەتەوە کە ئەم دۆخە دووبارە نەبێتەوە.

چیرۆکی سەرەکی: بەڕێوەبەر و یاریدەدەری قوتابخانەی فیردەوسی سەرەتایی کچان لە شاری جوانڕۆی ڕۆژهەڵاتی کوردستان، لەلایەن فەرمانگەی پەروەردەی شارەکەوە سزا دراون، هۆکارەکەشی گوتنەوەی سروودێک بووە لەلایەن قوتابییەکانەوە لە ساڵڕۆژی کیمیابارانی هەڵەبجەدا.

چی ڕوویدا: مامۆستا زەیتون کەهزادی، بەڕێوەبەری قوتابخانەکە و مامۆستا مێهری خوسرەو زادە، یاریدەدەری، بەهۆی ڕێکخستنی ئەم چالاکییە سزایان بەسەردا سەپێنراوە. مامۆستا زەیتون کەهزادی لە پۆستی بەڕێوەبەرایەتی لابراوە و ئێستا تەنیا وەک مامۆستا دەمێنێتەوە، لە کاتێکدا پلەی مامۆستایی مامۆستا مێهری خوسرەو زادە کەمکراوەتەوە. هەروەها بەڵێننامەیان پێ پڕکراوەتەوە کە جارێکی دیکە چالاکی لەو شێوەیە لە قوتابخانە یان پۆلەکانیاندا ئەنجام نەدەن.

زانیاریی زیاتر: سروودەکە لەمساڵدا و بەبۆنەی یادی کیمیابارانی هەڵەبجەوە لە بڵندگۆی قوتابخانەکە گوتراوە و ڤیدیۆکەشی بڵاوکراوەتەوە. دوای ئەوەی فەرمانگەی پەروەردە بەم ڕووداوەی زانیوە، دەستبەجێ لێکۆڵینەوەی دەستپێکردووە و بڕیاری سزادانی هەردوو مامۆستاکەی دەرکردووە.