ئاڤای خەڵک؛ گەڕەکێکی چەمچەماڵ 19 ساڵە کێشەی قیرتاوکردنی کۆڵانەکانیان هەیە

ئاڤا نیوز

دانیشتووانی گەڕەکی 48ـەکانی قەزای چەمچەماڵ، کە لە ساڵی 2006 ـەوە نیشتەجێن، لە دۆخێکی نالەباری خزمەتگوزاریدا دەژین بەهۆی قیرتاو نەکردنی کۆڵانەکانیان. ئەم کێشەیە بووەتە هۆی ناڕەزایەتی و بێزاری هاووڵاتیان.

زانیاریی بەدەستهاتوو: فاتیح سەید، یەکێک لە دانیشتووانی گەڕەکی 48ـەکان، بە ئاڤای وت: "لە ساڵی 2006 ـەوە ئێمە لەم گەڕەکەین و لە دۆخێکی زۆر ناخۆشداین. کۆڵانەکان قیرتاو نەکراون و کاتێک ئۆتۆمبێلێک تێپەڕ دەبێت دەبێتە تەپ و تۆزێکی زۆر."  چەندین جار داوای چارەسەرمان کردووە، بەڵام تا ئێستا کێشەکەمان چارەسەر نەکراوە.

لێدوانی فەرمی: ڕەمک ڕەمەزان، قایمقامی چەمچەماڵ، بە ئاڤای وت، پێشتر لەسەر بودجەی پترۆدۆلار پڕۆژە بۆ گەڕەکەکە دەرچوو بوو، ڕەسیف و چەورێژ تەواو کرابوون، بەڵام پڕۆسەی قیرتاوکردنەکە مایەوە کاتێک بودجە ڕاگیرا. ئێستا کۆمپانیایەکە چاوەڕێی بودجەیە، هەرکات پارە تەرخانکرا قیرتاو دەکرێت.

دڵنیایی دا کە "هەرکات بڕیاردرا بودجەی نوێی بۆ تەرخان بکرێت، قیرتاوی گەڕەکەکەش تەواو دەکرێت."