ئاڤا بەدواداچوون بۆ پرۆژەی ڕێگای مامەجەلکە - فریز- هیران دەکات

ئاڤا نیوز

پرۆژەی ڕێگای مامەجەلکە - فریز - هیران کارکردن تێیدا وەستاوە، ئێستا کار لەسەر دەستپێکردنەوەی کارەکانی پرۆژەکە دەکرێت.

وێنە گەورەکە: لە چوارچێوەی پاراستن و نۆژەنکردنەوەی ڕێگاوبانەکان، لە پێناو سەلامەتی هاتووچۆی هاونیشتمانیان، مانگی شەشی ساڵی ڕابردوو پرۆژەی ڕێگای سەرەکی مامەجەلکە - فریز – هیران بەردی بناغەی دانرا و دەست بە جێبەجێکردنی کرا، بەڵام بەهۆی کاریگەریی قەیرانی دارایی کارکردن لە پرۆژەکە وەستاوە.

داواکاری فەرمی: دانیشتووانی گوندەکانی ئەو سنوورە داوا دەکەن، کارکردن لە پرۆژەکە دەست پێبکاتەوە و ڕێگاکەیان بۆ تەواو بکرێت، هاوکات ژمارەیەک لە خاوەنی ئەو ئامێر و بارهەڵگرانەی لە پرۆژەکە کاریان کردووە و هێشتا پارەیان وەرنەگرتووە داوا دەکەن پارەکانیان بۆ خەرج بکرێت.

لێدوانی فەرمی: ئومێد خۆشناو، پارێزگاری هەولێر بە ئاڤا میدیای گوت، بۆ تەواوکردنی ئەو پرۆژەیە زیاتر لە سێ ملیار و نیو دیناری بۆ تەرخان کراوە، کەمتر لە دوو ملیاری بۆ خەرج کراوە و ئەوەی دیکەی ماوە، ئێستا لە هەوڵی دابینکردنی ئەو بڕە پارەیەین کە ماوە بۆ ئەوەی پرۆژەکە تەواو بکرێت.

لە لایەکی دیکەوە: عیماد محەممەد ئەمین، بەڕێوەبەری چاککردنەوە و پاراستنی ڕێگاوبانی هەولێر، بە ئاڤا میدیای گوت، کار لەسەر دەستپێکردنەوەی پرۆژەکە دەکەین، لەگەڵ دابینکردنی پارەی پێویست کارەکانی پرۆژەکە دەست پێدەکەینەوە و پارەی ئەو کەسانەش دەدەینەوە کە لە پرۆژەکە کاریان کردووە و شایستەی خۆیان وەرنەگرتووە.

ئەوەی پێویستە بیزانیت: پرۆژەی ڕێگای مامەجەلکە - فریز – هیران، درێژییەکەی 25 کیلۆمەترە و دەکەوێتە سنووری قەزای شەقڵاوە، ڕێگاکە لە سێڕیانی مامەجەلکە دەستپێدەکات تا دەگاتە سەنتەری ناحیەی هیران، ڕێگاکە هاتووچۆی ژمارەیەک گوندی سنوورەکەی لەسەرە، هاوکات ڕێگای سەرەکی هەولێر - سۆران دەبەستێتەوە بە ڕێگای سەرەکی شەقڵاوە - هیزۆپ.

زانیاریی زیاتر: پرۆژەکە بریتییە لە لادانی چینی قیڕی تێکچووی ڕێگاکە، پاشان چاککردنەوە و دووبارە قیڕتاوکردنەوەی، بودجەی پرۆژەکە سێ ملیار و 500 ملیۆن و 895 هەزار دینارە و،  لەلایەن بەڕێوەبەرایەتیی چاککردنەوە و پاراستنی ڕێگاوبانی هەولێر جێبەجێ دەکرێت، تا ئێستا کەمتر لە دوو ملیۆن دیناری بۆ خەرج کراوە و 75٪ـی کارەکانی کراوە.

بۆچی گرنگە: بە تەواوکردنی ئەو رێگایە جیا لەوەی هاتووچۆی دانیشتووانی سنوورەکە ئاسانتر دەکات، کاریگەری ڕاستەوخۆی دەبێت زیادبوونی هاتووچۆی گەشتیاران بۆ ناوچەکە.