وەزارەتی کارەبا لەسەر کارەبای 24 کاتژمێری سکاڵا لەسەر چەند دەزگایەکی میدیایی تۆمار دەکات

ئاڤا نیوز

دوای ئەوەی چەند میدیایەک هەواڵی کەم کردنەوەی کارەبای 24 کاتژمێریان بڵاوکردەوە، وەزارەتی کارەبای حکومەتی هەرێمی کوردستان دەڵێت "سکاڵای یاساییان لەسەر تۆمار دەکەین".

 

چیرۆکی سەرەکی: ڕۆژی 25-10-2025، لە میدیاکان لەسەر زاری وتەبێژی وەزارەتی کارەبا وا بڵاویان کردەوە کە لە وەرزی زستاندا کارەبای 24 کاتژمێری نامێنێت و نرخی کارەباش زیاد دەکرێت و جارێکی دیکە کار بە مۆلیدە ئەهلییەکان دەکرێت.

 

ڕاگەیێنراوی فەرمی: ئەمڕۆ یەکشەممە 26-10-2025، وەزارەتی کارەبای حکومەتی هەرێمی کوردستان ڕایگەیاند: هەواڵی کەناڵێکی ڕاگەیاندن لەسەر پڕۆژەی کارەبای 24 کاتژمێری ڕەتدەکەینەوە، چونکە ڕۆژانە پڕۆژەکە  فراوانتر دەبێت، تاوەکو کۆتایی ساڵی 2026 سەرجەم ناوچەکانی هەرێمی کوردستان دەگرێتەوە.

 

لە ڕاگەیێنراوەکەی وەزارەتی کارەبادا هاتووە، بڵاوکردنەوەی هەواڵی چەواشەکاری لە هەڵمەتی هەڵبژاردندا یاریکردنە بە هەست و سۆزی هاووڵاتیان، بۆیە وەزارەتی کارەبا بە مافی یاسایی خۆی دەزانێت، کە لە دادگا سکاڵا دژی ئەو کەناڵانە تۆمار بکات، کە هەواڵی ناڕاست و دوور لە بنەماکانی ڕاگەیاندن بڵاودەکەنەوە.

 

ئەوەی پێویستە بیزانیت: ڕۆژی شەممە ئاڤا بەدواداچوونی بۆ ئەم هەواڵە کرد و بۆ ئەم مەبەستەش قسەی لەگەڵ ئومێد ئەحمەد، وتەبێژی وەزارەتی کارەبای حکومەتی هەرێمی کوردستان کرد، ئەو بە ئاڤای گوت: ئەوەی لەبارەی کارەبای 24 کاتژمێری و بەرزکردنەوەی نرخی کارەبا لە وەرزی زستاندا بڵاوکراوەتەوە دوورە لە ڕاستییەوە.