نێچیرڤان بارزانی: پارتی دەبێتە حیزبی یەکەم لەسەر ئاستی عێراق

ئاڤا نیوز

نێچیرڤان بارزانی ڕایگەیاند: بە هەوڵ و پشتیووانی خەڵکی کوردستان، پارتی دەبێتە هێزی یەکەم لە سەرتاسەری عێراق و ملیۆنێک دەنگ زیاتر دەهێنێت.

وێنە گەورەکە: لە چوارچێوەی ئامادەکاریی بۆ هەڵبژاردنی پەرلەمانی عێراق، ئەمڕۆ یەکشەممە 26-10-2025 پارتی دیموکراتی کوردستان گەورەترین کەرنەڤاڵی بانگەشەی هەڵبژاردن لە ئاکرێ ئەنجام دا کە کەرنەڤاڵەکە تایبەت بە سنووری هەردوو قەزای ئاکرێ و بەردەڕەش.

لێدوانی فەرمی: نێچیرڤان بارزانی، جێگری سەرۆکی پارتی دیموکراتی کوردستان ڕایگەیاند: لە یەکەم ڕۆژی دامەزراندنی پارتییەوە تاوەکو ئێستا دەڤەری ئاکرێ و سنوورەکە بەشێکی دانەبڕاوبووە لە مێژووی و خەباتی پارتی.  

- بە هەوڵ و پشتیووانی خەڵکی کوردستان، پارتی دەبێتە هێزی یەکەم لەسەرتاسەری عێراق و ملیۆنێک دەنگ زیاتر دەهێنێت.

- پارتی لە ڕابردوو و لە ئێستاش سەلماندوویەتی کە هێزی پاراستنی پێکەوەژیانی ئایینی، هێزی هەق و هێزی نیشتمان پەروەری و هێزی کردار و ئاوەدانییە.

- ئەوەی تا ئێستا بڕیاری نەداوە داواتان لێدەکەم دەنگ بدەن بە پارتی دیموکراتی کوردستان، پرسیار بکەن خوێنی کێ لەسەر چیا و خاکی کوردستان هەیە و کێ قوربانی بۆ پێشکەوتن و ئاوەدانی داوە.

- زۆرینەی کات لایەنە سیاسییەکان، پارتییان بە تەنیا جێهێشتووە بۆ بەرگری سیاسی و یاسایی و چەکداری، بەڵام ئەوە خەمی ئێمە نییە چونکە پارتی خەمخۆری دۆزی گەلی کوردستانە. 

- پارتی پارێزەری ئاوەدانی و سەقامگیریی کوردستانە، ئەگەر پارتی بەهێز بێت کەس ناتوانێت دەستدرێژی بکات سەر مافی خەڵکی کوردستان.