ئاڤای خەڵک؛ وەزارەتی خوێندنی باڵا داوای گەڕانەوەی پارە لە قوتابییانی تواناسازی دەکات

ئاڤا نیوز

ژمارەیەک قوتابی پڕۆژەی تواناسازی نیگەرانن لە بڕیاڕێکی وەزارەتی خوێندنی باڵا، کە 14 ساڵ بەر لەئێستا بە مەبەستی خوێندنی ماستەر و دکتۆرا چوونەتە وڵاتی میسر، بڕیارەکە داوای گەڕانەوەی بەشێک لە پارەی تەرخانکراو دەکاتەوە بە بیانووی کەم مانەوە لەو وڵاتە.

چیرۆکی سەرەکی: ژمارەیەک لە قوتابییانی پڕۆژەی تواناسازی کە بۆ خوێندنی ماستەر و دکتۆرا چوونەتە میسر، نیگەرانی خۆیان دەربڕی بەرامبەر بڕیارێکی وەزارەتی خوێندنی باڵا و توێژینەوەی زانستی حکومەتی هەرێمی کوردستان، کە داوای گەڕاندنەوەی بەشێک لەو پارەیە دەکات کە پێیان دراوە، بە بیانووی کەم مانەوەیان لەو وڵاتە لە ساڵی 2011دا.

زانیاریی بەدەستهاتوو: قوتابییانی پڕۆژەی تواناسازی ڕایانگەیاندووە کە وەزارەتی خوێندنی باڵا داوای لێکردوون بڕێک پارە بگەڕێننەوە بۆ وەزارەت، بە بیانووی ئەوەی لە ساڵی 2011دا کەمتر لە نۆ مانگ لە میسر ماونەتەوە، ئەمەش بەدەرە لە ڕێنماییەکان. قوتابییەکان بە "پێچەوانەی عورفی کارگێڕی و یاسایی" وەسفی دەکەن.

بەپێی گوتەی قوتابییەکان، گرێبەستی واژۆکراو بۆ قوتابییانی ماستەر، مانەوەی نۆ مانگی لە کۆی پڕۆسەی خوێندنەکە لە وڵاتی خانەخوێ دیاری کردووە، هەروەها بۆ قوتابییانی دکتۆراش 18 مانگ، بەڵام وەزارەت یەک ساڵی وەک بنەما وەرگرتووە بۆ هەژمارکردنی مانەوە.

لێدوانی فەرمی: د. یاسین ساڵح، بەڕێوەبەری گشتیی نێردراوان لە وەزارەتی خوێندنی باڵا، بە ئاڤای ڕایگەیاند: "حکومەت بە دوو جۆر پارە بۆ قوتابییانی تواناسازی خەرج دەکات. جۆرێکیان بۆ کرێی خوێندنی ئەو زانکۆیەیە کە لێی دەخوێنن، و دووەمیان خەرجی ئەو کەسە و خێزانەکەیەتی لەو وڵاتە."

د. یاسین ساڵح ئاماژەی بەوەشدا: "بەپێی گرێبەست دەبێت قوتابییانی تواناسازی لە ساڵێکدا 9 مانگ لەو وڵاتە بمێننەوە، ئینجا پارەی یەک ساڵیان بۆ خەرج دەکرێت. ئەگەر لەو وادەیەش کەمتر بێت، پارەی پێنج مانگیان پێ دەدرێت."

زانیاریی زیاتر: سەبارەت بە چارەنووسی کێشەکە، د. یاسین ڕوونی کردەوە: کاتی خۆی ئەو کێشەیە درایە دادگا و ئەوانیش بڕیاریاندا ئەو پارەیە بگەڕێننەوە. پێشتریش خۆمان داوامان لە ئەنجوومەنی وەزیران کرد چاوپۆشی بکرێت و ڕەت کرایەوە، ئێستاش جارێکی دیکە دووبارە داوامان کردووەتەوە و چاوەڕێی وەڵامی ئەنجوومەنی وەزیرانین، ئەگەر هەموویشی نەبێت بەڵکو لە بەشێکی خۆش بین، داواشمان کردووە پارەکە بە قیست وەربگیرێتەوە.