ئاڤای خەڵک؛ هاوڵاتییانی مامەجەلکە و فریز و هیران داوای دەستپێکردنەوەی پڕۆژەی ڕێگاکەیان دەکەن

ئاڤا نیوز

پڕۆژەی ڕێگای سەرەکی مامەجەلکە - فریز - هیران، کە ساڵی ڕابردوو دەستیپێکرد و دواتر بەهۆی قەیرانی داراییەوە وەستا، جارێکی دیکە بووەتە داواکارییەکی گەرم لەلایەن دانیشتووانی گوندەکانی سنوورەکە و شۆفێرانی بارهەڵگر.

چیرۆکی سەرەکی: لە مانگی حوزەیرانی ساڵی ڕابردوودا، پڕۆژەی ڕێگای سەرەکی مامەجەلکە - فریز - هیران دەستیپێکرد. لەو کاتەشدا ئاڤا میدیا ڕۆڵی هەبوو لە گەیاندنی داواکاری خەڵکی ناوچەکە و بڕیاری دەستپێکردنی پڕۆژەکە، بەڵام دوای ماوەیەکی کەم بەهۆی نەبوونی بودجە و قەیرانی داراییەوە، کارەکانی پڕۆژەکە وەستان.

داواکاری فەرمی: ئێستا دانیشتووانی گوندەکانی سنوورەکە و شۆفێرانی بارهەڵگر، کە ڕۆژانە بەو ڕێگایەدا هاتووچۆ دەکەن، جارێکی دیکە پەنایان هێناوەتە بەر ئاڤا میدیا و داوا دەکەن دەنگیان بگەیێنرێتە لایەنی پەیوەندیدار بۆ ئەوەی پڕۆژەکە دەستپێبکاتەوە و ڕێگاکە تەواو بکرێت.

هاوکات، ژمارەیەک لە خاوەنی ئامێر و بارهەڵگرەکان کە لە قۆناغی یەکەمی پڕۆژەکەدا کاریان کردووە، هێشتا پارەی شایستەی خۆیان وەرنەگرتووە و داوای بەدواداچوون دەکەن بۆ ئەوەی قەرەبوو بکرێنەوە.

لێدوانە فەرمییەکان:

ئومێد خۆشناو، پارێزگاری هەولێر، بە ئاڤای ڕاگەیاند: "بۆ تەواوکردنی ئەو پڕۆژەیە زیاتر لە سێ ملیار و 500 ملیۆن دینار تەرخان کرا، کەمتر لە دوو ملیاری بۆ خەرج کراوە و ئەوەی دیکەی ماوە ئێستا لە هەوڵی دابینکردنی ئەو بڕە پارەیەین کە ماوە بۆ ئەوەی پڕۆژەکە تەواو بکرێت."

عیماد محەممەد ئەمین، بەڕێوەبەری گشتیی چاککردنەوە و پاراستنی ڕێگاوبانی هەولێریش، لە لێدوانێکدا بۆ ئاڤا میدیا وتی: "کار لەسەر دەستپێکردنەوەی پڕۆژەکە دەکەین. لەگەڵ دابینکردنی پارەی پێویست کارەکانی پڕۆژەکە دەست پێدەکەینەوە و پارەی ئەو کەسانەش دەدەینەوە کە لە پڕۆژەکە کاریان کردووە و شایستەی خۆیان وەرنەگرتووە."

باکگراوند: درێژیی ڕێگای مامەجەلکە 25 کیلۆمەترە و دەکەوێتە سنووری قەزای شەقڵاوە. ئەم ڕێگایە ڕێگای سەرەکی هەولێر - سۆران دەبەستێتەوە بە ڕێگای سەرەکی شەقڵاوە - هیزۆپ، بۆیە تەواوکردنی کاریگەرییەکی زۆری لەسەر هاتووچۆ و گواستنەوەی کاڵا و خزمەتگوزارییەکان دەبێت.