مۆساد ئەو گرووپەی ئاشکرا کرد کە لەسەر ئاستی جیهان هێرش دەکەنە سەر جووەکان

ئاڤا نیوز

ئیسرائیل یەکەیەکی نهێنی ئێرانی ئاشکراکرد کە بەرپرسیارن لە هێرشکردنە سەر دامەزراوە و کەسایەتییە جووەکان لە سەر ئاستی جیهان، گرووپێکی مافیای کوردیش بەشێکن لەو گرووپانەی کاریان بۆ دەکەن.

زانیاریی بەدەستهاتوو: مۆساد دەڵێت، سەردار عەمار کە فەرماندەیەکی سوپای پاسدارانی ئێرانە، سەرۆکایەتیی یەکەیەکی هێزی قودسی ئێرانی کردووە کە لە 11 هەزار کەس پێکهاتووە و پلانی هێرش و کردەوەی چەکداریان دژ بە جوولەکە و ئیسرائیلییەکان لە سەرانسەری جیهان، لە ئەورووپا و ئوسترالیاوە، دادەڕشت.

زانیاریی زیاتر: بە گوێرەی ڕاپۆرتەکەی مۆساد، یەکە نهێنییەکەی هێزی قودسی ئێران لە سەرانسەری جیهان تۆڕێکیان دروست کردووە بۆ ئەنجامدانی کردەوەی تیرۆریستی دژ بە دامەزراوە و کەسە جوولەکەکان.

ئەمەش بزانە: ئەندامانی ئەم یەکەیە بە نهێنی پەیوەندییان لەگەڵ کەسانی بیانیدا دروست کردووە تاوەکو لە ڕێگەی ئەوانەوە ئەو دامەزراوە و کەسە جوولەکانە بکرێنە ئامانج کە تاران دیاری کردوون.

بە تەنیشت ئەم بابەتەوە: لە مانگی چواری ئەمساڵ، کەناڵی سی ئێن ئێنی ئەمریکی ڕاپۆرتێکی وردی لەسەر ئەو گرووپە مافیایانە بڵاوکردەوە کە کار بۆ یەکە نهێنییەکەی ئێران دەکەن، گرووپەکەی ڕەوا مەجید مەترسیدارترین مافیای سویدیش کە بە ڕێوی کورد ناسراوە یەکێکە لەو گرووپانەی کە لە ئەوروپا کار بۆ ئێران دەکەن و جووەکان دەکەنە ئامانج.

ناو و وێنەی مافیاکانی سوید لە ڕاپۆرتێکی تایبەتی کەناڵی CNNـی ئەمریکی