كێشەكانی نەورۆز قووڵتر دەبنەوە؛ ڕاهێنەری یانەكە لە ئەركەكەی وازیهێنا

ئاڤا نیوز

تا دێت كێشەكانی یانەی نەورۆز قووڵتر دەبنەوە؛ دوێنێ یەكشەممە، بە ڕەزامەندیی هەردوولا، دەستەی كارگێڕی یانەی نەورۆز بڕیاریاندا بە هەڵوەشاندنەوەی گرێبەستی ڕاهێنەر یاسین ئاراس.

وێنە گەورەكە: یانەی نەورۆز لە دوایین یاری خۆیدا لە خولی ئەستێرەكانی عێراق، لەسەر یاریگەی خۆی و لەبەردەم هاندەرە دڵسۆزەكانی، بە یانەی دهۆك دۆڕا، ئێستا لەپاڵ ئەنجامە خراپەكانی، یانەكە لە دۆخێكی سەختی داراییدایە و مووچە و گرێبەستی یاریزانەكانی پێ دابین ناكرێت.

چی ڕوودەدات: بۆ چارەسەركردنی بەشێكی كەم لە گرفتەكانی یانەی نەورۆز، ماوەی حەوت ڕۆژە پرۆژەی ڕۆژی وەفا لەلایەن یانەكەوە ڕاگەیێنراوە بۆ هاوكاریكردن و كۆمەككردنی یانەكە لەڕووی داراییەوە، بەپێی زانیارییەكانی ئاڤا؛ تاوەكوو ئێستا زیاتر لە 35 ملیۆن دینار كۆكراوەتەوە.

لێدوانی فەرمی: نەوا لەتیف، بەڕێوەبەری ڕاگەیاندنی یانەی وەرزشی نەورۆز لەڕێگەی ئاڤاوە، سوپاسی خەڵکی کوردستانی كرد كە لە ناوخۆ و دەرەوەی کوردستان كە بەدەم بانگەوازەكەوە هاتوون و بەپێی توانا كۆمەكی یانەكەیان كردووە، وتیشی خەڵكانێكی زۆر نیەتی هاوكاریكردنیان پیشانداوە و مەبەستیانە یانەكە لەو دۆخەی تێیكەوتووە، دەربازی بێت.

باسی لەوەشكرد، تا ئێستا زیاتر لە 35 ملیۆن دینار كۆكراوەتەوە، هەرچەندە ئەم بڕە پارەیە تەواوی کێشەکانمان چارەسەر ناکات، بەڵام بە دڵنیایەوە سوودی دەبێت.