عێراق دۆسیەیەکی یاسایی 49 ملیۆن دۆلاری لە پاریس دەباتەوە

ئاڤا نیوز

وەزارەتی دادی عێراق ڕایدەگەیێنێت، لە دۆسیەیەکی یاساییدا کە لە دادگای پاریس لە دژی جووڵێنرابوو، سەرکەوتنی بەدەستهێنا.

ئەوەی پێویستە بیزانیت: دۆسیەکە لەلایەن کۆمپانیای "سەقری کەنداو"ـەوە کرابووەوە، کە داوای 49 ملیۆن دۆلاری ئەمریکی وەک قەرەبوو لە حکومەتی عێراق دەکرد. بەڵام دادگا بڕیارەکەی بە قازانجی عێراق دا و داواکەی کۆمپانیاکەی ڕەتکردەوە.

لێدوانی فەرمی: هەیسەم موحی ڕازی، بەڕێوەبەری گشتیی فەرمانگەی یاسایی لە وەزارەتەکە بە میدیای عێراقی ڕاگەیاند، کۆمپانیاکە لە ساڵی 2000دا دوو گرێبەستی لەگەڵ حکومەتی عێراقدا واژۆ کردبوو بۆ بەڕێوەبردنی کەرتی گواستنەوەی ئاسمانی. بەڵام، بەهۆی بارودۆخی نائاسایی و ڕووداوەکانی دوای ساڵی 2003، جێبەجێکردنی ئەو گرێبەستانە وەستا.

زانیاریی زیاتر: بە گوتەی ڕازی، کۆمپانیاکە دواتر هەوڵی داوە پەنا بۆ ناوبژیوانی نێودەوڵەتی ببات بۆ داواکردنی قەرەبووێکی گەورە، بەڵام تیمی وەزارەتی داد توانیویەتی هەموو بەڵگەکانی کۆمپانیاکە پووچەڵ بکاتەوە.

لەهەمان کاتدا: بەڕێوەبەری فەرمانگەی یاسایی جەختی لەوە کردەوە کە فەرمانگەکەیان هەوڵێکی زۆری داوە لە بەدواداچوونی ئەم دۆسیەیە، کە لە ساڵی 2023دا سەریهەڵداوە، بە هەماهەنگی لەگەڵ لایەنە حکومییە پەیوەندیدارەکان تا دەرچوونی بڕیاری کۆتایی بە قازانجی عێراق.