ئاڤای خەڵک؛ چەند مامۆستایەک لە ڕێگەی ئاڤا میدیاوە داوای دامەزراندن دەکەن

ئاڤا نیوز 

 

پێنج مامۆستا لەڕێگەی ئاڤاوە داوای چارەسەرکردنی کێشەکەیان دەکەن و دەڵێن، "چوار ساڵە وانە دەڵێینەوە بەڵام تا ئێستا نە بە گرێبەست نە بە هەمیشەیی دانەمەزراوین" و داواکارن ئاڤا دەنگیان بگەیێنێت.

 

چیرۆکی سەرەکی؛ پێنج مامۆستا سەردانی ئاڤایان کردووە و دەڵێن، "چوار ساڵە لە بنکەکانی نەهێشتنی نەخوێندەواری لە شاری هەولێر وانە دەڵێینەوە، ئێستاش لە بنکەی نەهێشتنی نەخوێندەوارین لە قوتابخانەی شاهەنگی بنەڕەتی، تاوەکو ئێستا نە بە گرێبەست نە بە هەمیشەیی دانەمەزراوین و ساڵانە تەنیا 800 هەزار دینارمان پێ دەدرێت، داواکارین دەنگمان بگەیێنن و دابمەزرێین".

لێدوانی فەرمی: سامان سیوەیلی، وتەبێژی وەزارەتی پەروەردەی کوردستان بە ئاڤای ڕاگەیاند: ئێمە لە وەزارەتی پەروەردە هیچ مامۆستایەکی خۆبەخش و وانەبێژمان نییە، بۆیە داوا لەو مامۆستایانە دەکەین هەر سبەی سەردانی وەزارەتی پەروەردە بکەن و لە نزیکەوە گوێمان لە داواکارییەکانیان بێت، تاوەکو بزانین گرفتەکەیان چییە و چۆن چارەسەر دەکرێت.