ئاڤای خەڵک؛ لە هەولێر ئاوی ئاوەڕۆ تێکەڵی ئاوی خواردنەوەی گەڕەکێک دەبێت

ئاڤا نیوز

 

چەند دانیشتوویەکی گەڕەکی 5ـی حەسارۆکی هەولێر گلەیی ئەوەیان دەکرد کە ئاوی پاکی خواردنەوەکەیان لەگەڵ ئاوی ئاوەڕۆ تێکەڵ بووە و گرفتی بۆ دروست کردوون، ئەوان لە ڕێگەی ئاڤاوە داوایان کردبوو کێشەکەیان بۆ چارەسەر بکرێت.

 

چیرۆکی سەرەکی؛ چەند دانیشتوویەکی لە گەڕەکی 5ـی حەسارۆک لە هەولێر ڤیدیۆیەکیان بۆ ئاڤا ناردووە و دەڵێن، بۆرییەکی ئاوی پاکی خواردنەوە لە گەڕەکەکە شکاوە و ئاوەکەش تێکەڵ بە ئاوەرۆ دەبێت و ئاوێکی زۆر بەهەدەر دەچێت. کێشەیەکی دیکەش کە ئەو هاووڵاتییانە ئاماژەی بۆ دەکەن ئەوەیە و دەڵێن، "ئاوی گەڕەکەکەمان زۆرباشە بەڵام هەندێک هاووڵاتی تەوافەی سەربانیان دانەناوە و ئاوێکی زۆر بەهەدەر دەچێت، داوا دەکەن بە ناچاری خەڵک ناچار بکرێت ئاو بەفیڕۆ نەدەن".

لێدوانی فەرمی: بەڕێوبەری ئاوی هەولێر لەبارەی بۆرییە شکاوەکە وتی، "دەستبەجێ تیم دەنێرین". دوای بەدواداچوونیش ئاڤای ئاگادار کردەوە "کە بۆریە شکاوەکەیان چاککردووەتەوە و ئێستا کێشەکە نەماوە".

زانیاریی زیاتر؛ لەبارەی دانانی تەوافەی سەربانیش کە یەکێکە لە کێشەکانی بەشێکی دیکەی دانیشتووانی ئەو گەڕەکە ئەو وتی، "بەدواداچوون دەکەین هەر ماڵێک تەوافەی تانکی نەبەستبێت سزا دەدرێت، ڕێگە نادەین ئاو بەفیڕۆ بدرێت".