ئەنجوومەنی وزاریی ئابووری چەند بڕیارێک سەبارەت بە گەنم و قەرزی نیشتەجێبوون دەدات

ئاڤا نیوز

ئەنجوومەنی وزاریی ئابووری عێراق بڕیاریدا، گەنمی خۆماڵی بە ئاشە ئەهلییەکان بە هەمان نرخی پێشوو بفرۆشرێت. بڕیاریشیدا سندووقی نیشتەجێبوون لە باجەکانی پارەدانی ئەلیکترۆنی بەدەر بکرێت.

چیرۆکی سەرەکی: د.فوئاد حوسێن، جێگری سەرۆکوەزیران و وەزیری دەرەوەی عێراق، سەرپەرشتی کۆبوونەوەی دانیشتنی دەیەمی ئەنجوومەنی وزاریی ئابووری کرد و چەند بڕیارێک لەو کۆبوونەوەیە دران.

ڕاگەیێنراوی فەرمی: ئەنجوومەنی وزاریی ئابووری بەیاننامەیەکی بڵاوکردەوە و ڕایگەیاند: بەمەبەستی کەمکردنەوەی هەژاری بۆ ساڵانی 2026-2030، تاوتوێی پلانێکی وەزارەتی پلاندانانی لە چوارچێوەی دانانی میکانیزمێک بۆ کەمکردنەوەی ئاستی هەژاری بۆ کەسانی بەرهەمهێنەر کرد.

ئەنجوومەنەکە گەیشتە چەند بڕیارێک ئەمانە بەشێکیانن:

- لەسەر داوای وەزارەتی بازرگانی، فرۆشتنی گەنم بە ئاشە ئەهلییەکان بە هەمان نرخی پێشوو کە 410 هەزار دینارە بۆ هەر تۆنێک بەردەوام دەبێت. 

- ئەنجوومەن ڕەزامەندی دەربڕی لەسەر بەدەر کردنی سندووقی نیشتەجێبوونی عێراق لە باجەکانی پارەدانی ئەلیکترۆنی و وەرگرتنیان وەک خەرجی کارگێڕی، چونکە بانکەکە قەرز بە هاووڵاتییان بەبێ سوو دەدات.