وەزیری سامانە سرووشتییەکان: لە کابینەی نۆیەم 61 پڕۆژەمان جێبەجێ کردووە

ئاڤا نیوز

وەزیری سامانە سرووشتییەکانی حکومەتی هەرێمی کوردستان لە میانەی کردنەوەی پڕۆژەی ڕاكێشانی هێڵی غازی سرووشتی هەولێر - دهۆک دەڵێت، لە کابینەی نۆیەم 61 پڕۆژەی کارەبا لە هەرێمی کوردستان جێبەجێ کراوە.

وێنە گەورەکە: کابینەی نۆیەم بەسەرۆکایەتیی مەسرور بارزانی، بەردەوامە لە جێبەجێکردنی پڕۆژە خزمەتگوزارییەکان لە سەرجەم ناوچە جیاوازەکانی هەرێمی کوردستان، پڕۆژەی ڕاکێشانی بۆریی غازی هەولێر - دهۆک یەکێكە لە پڕۆژە گرنگەکان بۆ دابینکردنی کارەبا.

لێدوانی فەرمی: کەمال محەممەد، وەزیری سامانە سرووشتییەکانی حکومەتی هەرێمی کوردستان ڕایگەیاند، ماوەی 14 ساڵە وێستگەی کارەبای "کواشێ" لە پارێزگای دهۆک دامەزراوە، بەڵام ئەمڕۆ یەکەمجارە گازی پێ دەگات.

زانیاریی زیاتر: بەپێی وتەکانی سامانە سرووشتییەکان، پێشتر تەنیا هەولێر و سلێمانی لەو گازە سوودمەند بوون، ئێستا هەموو کوردستان سوود لەو گازە دەبینن.

ئەوەی پێویستە بیزانیت: لە کابینەی نۆیەمدا 61 پڕۆژەی کارەبا جێبەجێ کراوە، هەروەها لەبواری دابەشکردنی کارەباش سێ هەزار و 200 پرۆژە جێبەجێ کراوە.

- هەر لەم کابینەیەدا، توانیومانە 1840 مێگاوات کارەبای نوێ بخەینە ناو تۆڕی کارەبای هەرێمی کوردستان، بەو ژمارەیەش توانای ژێرخانی کارەبای هەرێم بەرزکراوەتەوە بۆ  8200 مێگاوات کارەبا. 

 - لە سەرەتای دەست بە کاربوونی ئەم کابینەیە تەنیا 380 ملیۆن پێ سێ جا وەبەرهێنان لە غازدا هەبوو، بەڵام ئێستا وەبەرهێنان لە غازدا گەیشتووەتە 750 ملیۆن پێ سێ جا کە ئەمەش دەکات زیادبوون بە ڕێژەی دوو هێندە و زیاتر.