زاگرۆس فەتاح: پرۆژەکان لەسەر بنەمای داهاتی ناوخۆ جێبەجێ دەکرێن

ئاڤا نیوز

 

سەبارەت بە جێبەجێکردنی ئەو پڕۆژانەی کە لە سنووری هەردوو پارێزگای هەولێر و دهۆک جێبەجێکراون، ئەندامێکی مەکتەبی سیاسیی پارتی دەڵێت، "دوای ئەو قەیرانانەی لە ساڵی 2014 بە دواوە دروست بوون، پشت بە داهاتی ناوخۆ و خاڵە سنوورییەکان بەسترا، ئەو  پرۆژانە لەسەر ئەو بنەمایانە دابەشکراون".

 

چیرۆکی سەرەکی: ڕۆژی سێشەممە 28-10-2025، زاگرۆس فەتاح، ئەندامی مەکتەبی سیاسیی پارتی دیموکراتی کوردستان بەشداری لە بەرنامەی (گفتوگۆی ڕۆژان) لە ئاڤا میدیا کرد و لەسەر پرۆژەکانی کابینەی نۆیەمی حکومەت و ئەجێنداکانی سەرۆکوەزیران مەسرور بارزانی بۆ جێبەجێکردنی پرۆژە ستراتیژییەکان، هەروەها کۆمەڵێک تەوەر و پرسی دیکە گفتوگۆی کرد.

 

لێدوانی فەرمی: زاگرۆس فەتاح بە ئاڤای ڕاگەیاند، "ئێمە لە دوای ساڵی 2004ەوە تا ساڵی 2025 دوو قۆناغی ئابووریمان هەبووە، قۆناغی یەکەم لە ساڵی 2004 بۆ ساڵی 2014 بووە، لەو قۆناغەدا ئێمە خاوەنی سیاسەتی دارایی خۆمان بووین، بەڵام لەو کاتەشدا جیاوازییەک هەبوو لەنێوان شارەکاندا، چونکە لە هەندێک پارێزگا خزمەتگوزارییەکان باشتر پێشکەش دەکران، بەڵام لە هەندێک پارێزگای دیکە وانەبوو، ئەمەش بەهۆی ئیدارەدان کە ڕۆڵێکی سەرەکی هەبوو لە پێشکەشکردنی خزمەتگوزارییەکان".

 

باس لەوەش دەکات، "دوای ساڵی 2014 بەدواوە، بە تایبەت دوای ئەوەی تووشی ئەو قەیرانانە بووین، یەک میکانیزم هەبوو بۆ تەمویلکردنی ئەو پرۆژانە، ئەویش بەکارهێنانی داهاتی ناوخۆ بوو، بە تایبەتی داهاتی خاڵە سنوورییەکان و کۆکردنەوەی ئەو داهات و ڕسوماتانەی کە لەناو پارێزگاکان کۆدەکرایەوە، بەڵام لە هەندێک لەو پارێزگایانە، بەداخەوە نەماندەزانی ئەو داهاتانە چییان لێ دەهات".

 

هۆکارە زانراوەکان: بەپێی وتەکانی زاگرۆس فەتاح، "زۆر جار هەوڵ دراوە لە کابینەی نۆیەم میکانیزمێک ڕێک بخرێتەوە، بە تایبەتی داهاتی خاڵە سنوورییەکان، بۆئەوەی ببێتە داهات بۆ وەزارەتی دارایی، بەڵام بە ئاقارێکی دیکەیان برد، بۆیە نەتوانراوە، داهاتەکان بۆ خزمەتکردنی هاووڵاتیان بەکاربهێنرێتەوە بۆ جێبەجێکردنی پرۆژە خزمەتگوزارییەکان.