حکومەتی کوردستان لەبارەی یاریی ڕۆبڵۆكس بڕیارێکی دەرکرد و سانسۆر دەكرێت

ئاڤا نیوز

بە بڕیاری وەزارەتی گواستنەوە و گەیاندنی هەرێمی كوردستان، یاریی ڕۆبڵۆكس سانسۆر دەكات ئەمەش بەهۆی ئەو زیانە زۆرانەی كە یارییەكە بۆ بەكارهێنەران بەگشتی و منداڵان بەتایبەتی هەیەتی.

وێنە گەورەکە: یاریی "ڕۆبلۆکس" پلاتفۆرمێکی ئۆنلاینە کە ڕێگە بە بەکارهێنەرانی دەدات یاری دروست بکەن و یارییەکانی یەکتر تاقی بکەنەوە. زیاتر لەلایەن منداڵان و هەرزەکارانەوە بەکاردێت، جیهانێکی خەیاڵی گەورە بۆ منداڵان دەڕەخسێنێت و بەو هۆیەشەوە پێیەوە ئالوودە دەبن.

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندن بە ئاڤای ڕاگەیاند: وەزارەتی گواستنەوە و گەیاندن دوای بەدواداچوونی ورد بڕیاری دا پێداچوونەوە بە بەشێك لەو پلاتفۆرمە یارییە ئەلیكترۆنییانە بكرێت كە ئێستا لە هەرێمی كوردستان و عێراق و جیهان بە فراوانی بەكاردەهێنرێن كە یەكێك لەوانە یاریی ڕۆبڵۆكسە كە كاریگەریی نەرێنی بۆ سەر منداڵانی خوار تەمەنی هەشت ساڵی دروست كردووە.

گوتیشی: وەزارەتی گواستنەوە بەپێویستی دەزانێت لە نزیكترین كاتدا یاریی ڕۆبڵۆكس سانسۆر و قەدەغە بكات ئەمەش لەڕێگەی پاكێجە خێزانییەكانی كۆمپانیاكانی ئینتەرنێت، واتا لەمەودوا هەموو خێزانێك دەتوانێت لەڕێگەی ئەو پاكێجانەوە ڕێگە بە بەكارهێنانی یارییەكە بدات.

لەلایەكی دیكەوە: ڕۆژی 19ـی تشرینی یەكەم، وەزارەتی گەیاندنی عێراق ڕایگەیاند، بە مەبەستی پاراستنی ئاسایشی کۆمەڵایەتی و بەها ئەخلاقی و پەروەردەیی خێزان و منداڵان و پاراستنی سەلامەتی بەکارهێنەرانی خزمەتگوزارییەکانی ئینتەرنێت لە عێراق، بڕیاری قەدەغەکردنی یاریی "ڕۆبلۆکس"ـی دەرکردووە، ئەمەش بە پشتبەستن بە بڕیارەکانی دادگای باڵای فیدراڵی.

لەهەمان كاتدا: وەزارەتەکەی عێراق ڕوونیکردەوە کە ئەم بڕیارە دوای لێکۆڵینەوەیەکی ورد و چاودێریکردنی مەیدانی دێت، کە دەریخستووە یارییەکە چەندین مەترسیی ئەمنی، کۆمەڵایەتی و ڕەفتاری لەخۆدەگرێت. لەوانە: ڕێگەدان بە پەیوەندی ڕاستەوخۆ لە نێوان بەکارهێنەراندا بە شێوەیەک کە منداڵان و هەرزەکاران ڕووبەڕووی هەوڵەکانی قۆستنەوە یان هەڕەشەی ئەلیکترۆنی دەکاتەوە. هەروەها، هەندێک لە ناوەڕۆکی یارییەکە دیمەن و ڕەفتارگەلێکی تێدایە کە لەگەڵ بەها و نەریتە کۆمەڵایەتییەکان یەکناگرنەوە.